გრძელდება საინფორმაციო შეხვედრები GRUNI-ს სამეცნიერო/კვლევითი საქმიანობის გასაუმჯობესებლად

საუნივერსიტეტო საზოგადოების სამეცნიერო/კვლევითი საქმიანობის გასაუმჯობესებლად გრძელდება საინფორმაციო-საკონსულტაციო შეხვედრები ახალ კვლევით საგრანტო პროექტებთან დაკავშირებულ საკითხებზე, რომლებიც ორგანიზებულია „ჰორიზონტი ევროპას“ საქართველოს ეროვნული ოფისის მიერ. გრუნის სახელით შეხვედრებს ესწრება სამეცნიერო კვლევების მართვის ცენტრის ხელმძღვანელი, ასოცირებული პროფესორი – გოჩა ოჩიგავა.

პირველი შეხვედრა გაიმართა 17 ივლისს, განიხილეს თემა: „ევროპული ერთობლივი ღრუბელი კულტურული მემკვიდრეობისთვის“ (მე-2 კლასტერი – კულტურა, კრეატიულობა, ინკლუზიური საზოგადოება);

შემდეგი შეხვედრა დაეთმო ევროპული კვლევების საბჭოს საგრანტო მიმართულებების: Advance Grant, Starting Grant, Synergy Grant, განხილვას;

ბოლო შეხვედრაზე, რომელიც გაიმართა 26 ივლისს, გაფართოებულ ფორმატში, სახელმწიფო ორგანოების, საზოგადოებრივი ორგანიზაციების, კვლევითი ცენტრების წარმომადგენლებს მისასალმებელი სიტყვით მიმართა საქართველოს განათლების, მეცნიერებისა და ახალგაზრდობის სამინისტროს მეცნიერების განვითარების დეპარტამენტის ხელმძღვანელმა – ქეთევან ქოქრაშვილმა. ისაუბრეს ევროპული კვლევის არეალის – ERA- ს არსისა და ახალი კონკურსების შესახებ.

შეხვედრები ამ მიმართულებით გრძელდება. მონაწილეებს ეთხოვათ, გაევრცელებინათ ინფორმაცია იმ ახალი შესაძლებლობის შესახებ, რომელიც აკადემიური/სამეცნიერო პერსონალის, ახალგაზრდა მკვლევრების, ევროპაში, კონკრეტულ პროექტებთან დაკავშირებით, საინფორმაციო შეხვედრებზე დასწრების დაფინანსებასა და მათი სამეცნიერო პოტენციალის უკეთ წარმოჩენას ეხება. ასევე, უნივერსიტეტების წარმომადგენლებმა მიიღეს მითითება, როგორ დაეხმარონ აკადემიურ/სამეცნიერო პერსონალს ახალ კვლევებთან დაკავშირებული იდეების უკეთ წარმოჩენასა და განხორციელებაში.

გრუნის სამეცნიერო კვლევების მართვის ცენტრის ორგანიზებით, დამატებითი ინფორმაცია და საპრეზენტაციო მასალა დაეგზავნა გრუნის კვლევით ერთეულებს.

უნივერსიტეტის სხვა ამბები