„იქნებ დაუშვათ გამონაკლისი..“ – დაწყებითი საფეხურის მასწავლებლის გამოცდაზე აპლიკანტმა 9 წუთით დააგვიანა

დღეს, 23 ივლისს, დაწყებითი კლასების მასწავლებლობის მსურველები გამოცდას ქართულში, მათემატიკასა და ბუნებისმეტყველებაში აბარებენ. თბილისის 175-ე საჯარო სკოლის საგამოცდო ცენტრში აპლიკანტი 9 წუთის დაგვიანებით გამოცხადდა.

როგორც EDU.ARIS.GE-ს ჟურნალისტი ადგილიდან გვატყობინებს, ის საგამოცდო ცენტრში აღელვებული მივიდა და შიდა ტერიტორიაზე გაუფრთხილებლად აპირებდა შესვლას, თუმცა ცენტრის თანამშრომლებს დროული რეაგირება ჰქონდათ.

ქალბატონმა განგვიმარტა, რომ მასწავლებლობის მსურველია, თუმცა ტესტირებაზე დაგვიანების მიზეზზე საუბარი არ ისურვა.

აღელვებული აპლიკანტი გამოცდაზე დაშვებას ითხოვდა: “იქნებ დაუშვათ გამონაკლისი, საგამოცდო ბარათიც არ მაქვს ამობეჭდილი, ტელეფონში ჩავიწერე და გაჩვენებთ”, – უხსნიდა ის ცენტრის წარმომადგენლებს, თუმცა გამოცდაზე არ დაუშვეს.

ეს პირველი შემთხვევა არ არის, როცა გამოცდებზე მოქმედი პედაგოგები და მსურველებიც იგვიანებენ. მათთვის რეგისტრაციის დრო სხვა გამოსაცდელების მსგავსად, ერთი საათია. საგამოცდო ცენტრის წარმომადგენლები კი აპლიკანტებს გამოცდაზე დროულად გამოცხადებისა და უფრო მეტი მობილიზებისკენ მოუწოდებენ.

ასევე იხილეთ:

განახლებადი ინფორმაცია გამოცდების შესახებ

მოამზადა მზეო შველიძემ