პოლონური დელეგაციის ვიზიტი და საჯარო ლექციები CIU-ში

კავკასიის საერთაშორისო უნივერსიტეტმა ბიზნესისა და მეწარმეობის უნივერსიტეტის (ქ. ოსტროვეც-სვენტოკშისკი, პოლონეთი) დელეგაციას უმასპინძლა.

უნივერსიტეტის ინფორმაციით, ვიზიტის ფარგლებში გაიმართა შეხვედრა CIU-ს რექტორთან, კახაბერ კორძაიასა და ადმინისტრაციის წარმომადგენლებთან, სადაც მხარეებმა არსებული ურთიერთთანამშრომლობა და სამომავლო პერსპექტივები განიხილეს.

CIU-ს სოციალურ მეცნიერებათა ფაკულტეტის დეკანმა, ნანა ამირანაშვილმა და მედიცინის ფაკულტეტის დეკანმა, მაგდა თორთლაძემ ფაკულტეტების ტურის ფარგლებში სტუმრებს საუნივერსიტეტო სივრცე გააცნეს და საპარტნიორო მიმართულებები დასახეს.

ამავე დღეს, სოციალურ მეცნიერებათა ფაკულტეტის სტუდენტებისთვის ჩატარდა ბიზნესისა და მეწარმეობის უნივერსიტეტის ეკონომიკური დეპარტამენტის ხელმძღვანელის, ევროპული სტრატეგიული კვლევებისა და ანალიზის ცენტრალური ინსტიტუტის (CIRSA) ხელმძღვანელის, პრჟემისლავ ფურგაშის საჯარო ლექცია თემაზე: „ნედლი ნავთობის ფასების მანიპულირება, როგორც საფრთხე ეკონომიკური უსაფრთხოებისთვის“, მედიცინის ფაკულტეტის სტუდენტებისთვის კი მედიცინის მეცნიერებათა დოქტორის, მონიკა ბორეკის საჯარო ლექცია თემაზე – „რატომ არის ქართული ღვინო ჯანსაღი – ანტიოქსიდანტების როლი და მნიშვნელობა მედიცინაში“.

ასევე, გაიმართა CIU-ს ბიზნესის ფაკულტეტის დეკანის, გიორგი აბაშიშვილის შეხვედრა ბიზნესისა და მეწარმეობის უნივერსიტეტის რექტორთან, პაველ გოტოვიეცკისთან. შეხვედრის ფარგლებში მხარეებმა განიხილეს: სამომავლო თანამშრომლობის პერსპექტივები ბიზნეს განათლების მიმართულებით; კავკასიის საერთასორისო უნივერსიტეტის ბიზნესის ფაკულტეტთან ერთობლივი პროგრამების განხორციელება; კოვიდის გავლენა საგანმანათლებლო სექტორზე, მიმდინარე გამოწვევები და სამომავლო პერსპექტივები.

აღსანიშნავია, რომ უნივერსიტეტებს შორის ერასმუს + -ის პროგრამის ფარგლებში საკმაოდ აქტიური თანამშრომლობაა, რაც გამოიხატება ერთობლივი ინგლისურენოვანი სამაგისტრო პროგრამის (გლობალური პოლიტიკისა და უსაფრთხოების კვლევები) განხორციელებით, ერთობლივი საერთაშორისო სამეცნიერო კონფერენციის ორგანიზებითა და სტუდენტების/აკადემიური პერსონალის გაცვლითი პროგრამებით.

კავკასიის საერთაშორისო უნივერსიტეტის სხვა ამბები