ქართველი სტუდენტების სწავლას არაბთა გაერთიანებული საამიროების მხარე დააფინანსებს – რა (არ) ვიცით

5 თებერვალს, საქართველოს განათლების, მეცნიერებისა და ახალგაზრდობის სამინისტრომ გვამცნო, რომ მინისტრი გივი მიქანაძე დუბაიში არაბთა გაერთიანებული საამიროების უმაღლესი განათლებისა და სამეცნიერო კვლევის მინისტრს, დოქტორ აბდულრაჰმან აბდულმანან ალ ავარს შეხვდა, რომლის ფარგლებში “მხარეებმა განათლების სფეროში თანამშრომლობის გაღრმავების პერსპექტივები განიხილეს”.

გავიგეთ ისიც, რომ ამ შეხვედრაზე ქართველი სტუდენტებისთვის საინტერესო საკითხზე იმსჯელეს.

“განსაკუთრებული ყურადღება დაეთმო ახალი საგანმანათლებლო პროექტის განხორციელების საკითხს, რომლის ფარგლებშიც არაბთა გაერთიანებული საამიროების მხარე უზრუნველყოფს ქართველი სტუდენტების სწავლის დაფინანსებას ადგილობრივ უნივერსიტეტებში. აღინიშნა, რომ სტუდენტების მიღება მიმდინარე წელს დაიწყება”, – გვიყვებოდა განათლების სამინისტრო 5 თებერვალს.

EDU.ARIS.GE-მ ახალი საგანმანათლებლო პროექტის შესახებ მეტი ინფორმაციის გასაჯაროება განათლების სამინისტროს სთხოვა, თუმცა არც პროგრამის დეტალებზე მიგვიღია პასუხი და არც ის დაგვიზუსტეს “ადგილობრივ უნივერსიტეტებში” არაბთა გაერთიანებული საამიროები იგულისხმება, თუ საქართველო.

ინფორმაციის მიღებას ყოველ წუთს ველოდებით და ასეთის არსებობის შემთხვევაში, სიახლე განახლდება.

განათლების, მეცნიერებისა და ახალგაზრდობსი სამინისტროს 5 ტებერვლის ინფორმაციით კი:

“გივი მიქანაძემ შეხვედრის მონაწილეებს მადლობა გადაუხადა მხარდაჭერისთვის. მისი თქმით, ეს ინიციატივა სტუდენტებისთვის საერთაშორისო სტანდარტების შესაბამისი ცოდნის მიღების კიდევ ერთი მნიშვნელოვანი შესაძლებლობა იქნება. თავის მხრივ, დოქტორმა აბდულრაჰმან აბდულმანან ალ ავარმა ქართულ მხარესთან თანამშრომლობის მზადყოფნა დაადასტურა. შეხვედრის მონაწილეები შეთანხმდნენ ერთობლივი სამუშაო ჯგუფის ჩამოყალიბებაზე, რომელიც კონკრეტული მიმართულებებით პარტნიორობის გაძლიერებაზე იმუშავებს. მხარეებმა, საგანმანათლებლო კავშირების კიდევ უფრო გაძლიერების მიზნით, მზადყოფნა გამოთქვეს, მომავალშიც აქტიურად განაგრძონ თანამშრომლობა და განახორციელონ ერთობლივი პროექტები”.