რა შედეგებს უნდა მიაღწიოს მოსწავლემ მათემატიკაში I-IX კლასების ბოლოს

სხვადასხვა ცვლილების შემდეგ ეროვნული სასწავლო გეგმით განსაზღვრულია რა შედეგები უნდა ჰქონდეთ მიღწეული და რა სტანდარტებს უნდა აკმაყოფილებდნენ დაწყებითი და საბაზო საფეხურის მოსწავლეები არჩევით თუ ძირითად საგანში.

EDU.ARIS.GE-მ უკვე წარმოგიდგინათ რა შედეგები უნდა დააკმაყოფილონ მოსწავლეებმა ესგ-ში შეტანილი ცვლილებებით ქართულ ენასა და ლიტერატურაში. ამჟამად კი სასწავლო საფეხურების გათვალისწინებით მათემატიკის საგანში მისაღწევ შედგებს გთავაზობთ:

I-IV კლასების სტანდარტი.

IV კლასის ბოლოს მოსწავლეს მათემატიკაში შემდეგი შედეგებისთვის უნდა ჰქონდეს მიღწეული:

რიცხვები და მოქმედებები – მოსწავლე უნდა ფლობდეს და იყენებდეს რიცხვის ცნებას და რიცხვის წარმოდგენის საშუალებებს; მოსწავლემ უნდა შეძლოს რიცხვების შედარება და კლასიფიცირება; უნდა შეძლოს ძირითადი არითმეტიკული ოპერაციების შესრულება რიცხვებზე; ნატურალურ რიცხვებზე მოქმედების შედეგის მიახლოებით შეფასება და რიცხვების დამრგვალება; ზომის სხვადასხვა ერთეულის გამოყენება და ერთმანეთთან დაკავშირება.

გეომეტრია და სივრცის აღქმა – მოსწავლეს უნდა შეეძლოს ფიგურების იდენტიფიკაცია, კლასიფიცირება, გამოსახვა; საგანთა და ფიგურათა ზომებისა და ობიექტთა შორის მანძილების პოვნა; ორიენტირება სიბრტყეზე.

კანონზომიერებები და ალგებრა – მოსწავლეს უნდა შეეძლოს საგნებს შორის ან საგნებსა და მათ ატრიბუტებს შორის მოცემული შესაბამისობის გავრცობა, გამოსახვა და გამოკვლევა. რიცხვითი გამოსახულების შემცველი ტოლობის შედგენა და მისი გამოყენება პრობლემის გადასაჭრელად.

 მონაცემთა ანალიზი, ალბათობა და სტატისტიკა – მოსწავლეს უნდა ჰქონდეს ელემენტარული წარმოდგენები ინფორმაციის მოპოვების საშუალებების შესახებ; მოსწავლე უნდა ფლობდეს ინფორმაციის მოწესრიგებისა და წარმოდგენის ხერხებს (საშუალებებს); მოსწავლემ უნდა შეძლოს თვისებრივ და რაოდენობრივ მონაცემთა ინტერპრეტაცია და ელემენტარული ანალიზი.

მსჯელობა-დასაბუთება, პრობლემის გადაჭრა – მოსწავლემ უნდა შეძლოს ყოველდღიური ცხოვრებიდან ან ბუნებისმეტყველების დარგებიდან მომდინარე მარტივი ამოცანების ამოხსნა.

 V-VI კლასების სტანდარტი.

 მისაღწევი შედეგები VI კლასის ბოლოს:

რიცხვები და მოქმედებები – მოსწავლემ უნდა შეძლოს ნატურალური და არაუარყოფითი რაციონალური რიცხვების გამოსახვა, კლასიფიცირება და გამოყენება; ნატურალურ და არაუარყოფით რაციონალურ რიცხვებზე არითმეტიკული მოქმედებების შესრულება; ნატურალურ რიცხვებზე მოქმედების შედეგის მიახლოებით შეფასება და რიცხვების დამრგვალება.ზომის სხვადასხვა ერთეულის ერთმანეთთან დაკავშირება და გამოყენება.

გეომეტრია და სივრცის აღქმა – მოსწავლემ უნდა შეძლოს ბრტყელი და სივრცული გეომეტრიული ფიგურების ამოცნობა, აღწერა და გამოსახვა, ფიგურებს შორის და ფიგურის ელემენტებს შორის მიმართებების დადგენა; ბრტყელი ფიგურის ფართობის გამოთვლა და გამოყენება რეალური ვითარების შესაბამის ამოცანებში; გეომეტრიული გარდაქმნების დემონსტრირება. ორიენტირება ბადით დაფარულ არეზე.

კანონზომიერებები და ალგებრა – მოსწავლემ უნდა შეძლოს, სიდიდეებს შორის დამოკიდებულების გამოსახვა და აღწერა; ალგებრული გამოსახულების შედგენა და გამარტივება.

მონაცემთა ანალიზი, ალბათობა და სტატისტიკა – მოსწავლემ უნდა შეძლოს, დასმული ამოცანის ამოსახსნელად საჭირო თვისებრივი და რაოდენობრივი მონაცემების მოპოვება; თვისებრივი და რაოდენობრივი მონაცემების დასმული ამოცანის ამოსახსნელად ხელსაყრელი ფორმით წარმოდგენა. თვისებრივ და რაოდენობრივ მონაცემთა ინტერპრეტაცია და ელემენტარული ანალიზი.

მსჯელობა-დასაბუთება, პრობლემის გადაჭრა – მოსწავლემ უნდა შეძლოს, პრობლემების გადაჭრა გამოთვლების, ვარიანტების დათვლის და ობიექტებსა და მათ თვისებებს შორის მიმართებების გამოყენებით.

საბაზო საფეხურის სტანდარტი:

მსჯელობა-დასაბუთება – მოსწავლემ უნდა შეძლოს, მათემატიკური ან სხვა საგნებიდან მომდინარე ამოცანების განხილვისას ჰიპოთეზების ჩამოყალიბება, მათი მართებულობის დადგენა ან უარყოფა; მსჯელობის ხაზის განვითარება; განზოგადებით ან დედუქციით მიღებული დასკვნების დასაბუთება.

მათემატიკური ენა, კომუნიკაციის მათემატიკური ხერხები – მოსწავლემ უნდა შეძლოს,მათემატიკური ობიექტების განსაზღვრებებისა და თვისებების სწორად ჩამოყალიბება; მათემატიკური ტერმინების, აღნიშვნებისა და სიმბოლოების კორექტულად გამოყენება; მათემატიკურ დებულებათა ფორმულირების ხერხების კორექტულად გამოყენება; გრაფიკულად გადმოცემული მათემატიკური შინაარსის ინფორმაციის წაკითხვა; მათემატიკური ობიექტების გრაფიკული ხერხით (გრაფიკების, დიაგრამების და ნახაზების სახით) წარმოდგენა.

მათემატიკური მოდელირება, პრობლემების გადაჭრა – მოსწავლემ უნდა შეძლოს, ყოველდღიურ ცხოვრებაში არსებულ ობიექტებსა და პროცესებში მათემატიკური ობიექტების მოდელებისა და მიმართებების შემჩნევა და მათი თვისებების გამოყენება მოდელის აგებისას, პრაქტიკული ამოცანების გადაჭრისას; ამოცანის შინაარსის აღქმა, ამოცანის მონაცემებისა და საძიებელი სიდიდეების გააზრება-გამიჯვნა, პრობლემის გამოკვეთა და მისი ჩამოყალიბება; კომპლექსური (რთული) პრობლემის საფეხურებად, მარტივ ამოცანებად დაყოფა და ეტაპობრივად გადაჭრა/ამოხსნა; ამოცანის ამოხსნის შემდეგ მიღებული შედეგის კრიტიკული შეფასება ამოცანის კონტექსტის გათვალისწინებით.

რა შედეგებზე უნდა გაიყვანოს მასწავლებელმა მოსწავლე ქართულში დაწყებითიდან საბაზო საფეხურის ჩათვლით – ცვლილება ესგ–ში

მოამზადა გვანცა ღვედაშვილმა