როდის მიიღებენ სწავლის დაფინანსებაზე პასუხს სოციალური პროგრამის ფარგლებში რეგისტრირებული სტუდენტები – განმარტება

სოციალური პროგრამის ფარგლებში განათლების, მეცნიერებისა და ახალგაზრდობის სამინისტროს მიერ გამოცხადებული რეგისტრაციის ფარგლებში დარეგისტრირებული პირები სწავლის დაფინანსების ან არდაფინანსების შესახებ ინფორმაციას 2024 წლის ნოემბრის ბოლომდე მიიღებენ.

როგორც EDU.ARIS.GE-ს 5 ნოემბერს, განათლების სამინისტროში განუმარტეს, სწორედ ამ დროს უნდა დაელოდონ პროგრამის ფარგლებში რეგისტრირებულები პასუხს, ამ ეტაპზე კი მათი განაცხადების განხილვა მიმდინარეობს.

რაც შეეხება პასუხის მიღების ფორმას, როგორც უწყებაში განგვიმარტეს, სტუდენტი ინფორმაციას მიიღებს როგორც მოკლე ტექსტური შეტყობინებით იმ ნომერზე, რომელიც რეგისტრაციისას მიუთითა, ასევე, დაფინანსების თაობაზე ინფორმაცია გამოჩნდება მათ პირად სარეგისტრაციო გვერდზეც.

უმაღლეს საგანმანათლებლო დაწესებულებებს, დაფინანსებულ სტუდენტთა სიები, განათლების მინისტრის შესაბამის ბრძანებასთან ერთად გადაეგზავნებათ.

ცნობისთვის, სახელმწიფო სასწავლო გრანტით დაფინანსების მიზნით, სოციალური პროგრამის ფარგლებში განაცხადების წარმოდგენა ბაკალავრიატის, მასწავლებლის მომზადების ინტეგრირებული საბაკალავრო-სამაგისტრო, ვეტერინარის ინტეგრირებული სამაგისტრო, დიპლომირებული მედიკოსის/სტომატოლოგიის აკრედიტებულ საგანმანათლებლო პროგრამებზე ჩარიცხულ სტუდენტებს 26 სექტემბრის ჩათვლით შეეძლოთ.

პროგრამის ფარგლებში 16 კატეგორიის სტუდენტთა დაფინანსება უნდა განხორციელდეს.

პროგრამის შესახებ დეტალური ინფორმაცია

ვის ეხება დაფინანსება:

• მაღალმთიანი სოფლების სტატუსის მქონე სკოლების კურსდამთავრებულები;
•  სტუდენტები ოკუპირებული ტერიტორიებიდან;
•  ტერიტორიული მთლიანობისათვის საბრძოლო მოქმედებების შედეგად დაღუპულთა შვილები, მკვეთრად/მნიშვნელოვნად შეზღუდული შესაძლებლობის მქონე ვეტერანები ან მათი შვილები;
•  ობოლი (უდედმამო) სტუდენტები;
•  მრავალშვილიანი (4 და მეტი შვილი) ოჯახის წევრები;
•  სოციალურად დაუცველი სტუდენტები (ოჯახის სარეიტინგო ქულით 70000 და ქვევით);
•  სტუდენტები, რომლებიც იმყოფებოდნენ სახელმწიფო მზრუნველობის ქვეშ;
•  აზერბაიჯანულენოვანი სკოლების კურსდამთავრებულები;
• სომხურენოვანი სკოლების კურსდამთავრებულები;
•  სტუდენტები, რომელთაც მოპოვებული ჰქონდათ რეპატრიანტის სტატუსი;
•  ოკუპირებულ ტერიტორიებთან გამყოფი ხაზის მიმდებარე სოფლების სკოლების კურსდამთავრებულები;
• შეზღუდული შესაძლებლობის მქონე სტუდენტები;
•  აუტიზმის სპექტრის აშლილობის მქონე პირები;
•  საერთაშორისო მშვიდობისა და უსაფრთხოების შენარჩუნებისა და აღდგენის ოპერაციებში ან სხვა სახის სამშვიდობო საქმიანობის განხორციელებისას გარდაცვლილის, ან ამ მისიებში მიღებული ჯანმრთელობის დაზიანების შედეგად გარდაცვლილი საქართველოს თავდაცვის სამინისტროს სამხედრო მოსამსახურეების შვილები, სამშვიდობო საქმიანობის განხორციელების შედეგად მკვეთრად/მნიშვნელოვნად გამოხატული შეზღუდული შესაძლებლობების სტატუსის მქონე პირები ან მათ შვილები.
•  საქართველოს თავდაცვის სამინისტროს სისტემაში, სამსახურებრივი მოვალეობის შესრულებისას დაღუპული სამხედრო მოსამსახურეების შვილები.
•  პირები, რომლებიც საქართველოს ზოგადსაგანმანათლებლო დაწესებულებაში სწავლის პერიოდში იყვნენ საქართველოს განათლების, მეცნიერებისა და ახალგაზრდობის სამინისტროს მიერ განხორციელებული „ინკლუზიური სწავლების ხელშეწყობა‘‘ პროგრამის, „განათლების მიღების მეორე შესაძლებლობა სოციალური ინკლუზიით‘‘ ქვეპროგრამის ბენეფიციარები, როგორც ბოშა მოზარდები.

ასევე იხილეთ:

რომელ სტუდენტებს დაუფინანსდებათ სწავლა სოციალური პროგრამის ფარგლებში – განაცხადების მიღება დაიწყო