როდის შეეძლება გამოცდაზე დაგვიანებულ ან გამოუცხადებელ აბიტურიენტს დამატებითი ტესტირება მოითხოვოს – ბრძანება

„ერთიანი ეროვნული გამოცდების ჩატარების დებულებაში“ ცვლილებები შევიდა. ამის შესახებ დღეს, 28 ივნისს საკანონმდებლო მაცნეზე გამოქვეყნებული დოკუმენტით ვიგებთ, რომელსაც განათლებისა და მეცნიერების მინისტრის მოვალეობის შემსრულებელი, ნოდარ პაპუკაშვილი აწერს ხელს.

დებულებას ახალი პუნქტები დაემატა და გაიწერა, რომ ტესტირებაზე გამოუცხადებელ აბიტურიენტს უფლება აქვს მოითხოვოს დამატებითი ტესტირების ჩატარება, თუ მან საგამოცდო ბარათში მითითებულ დროს ვერ შეძლო გამოცდაზე გამოცხადება შემდეგი მიზეზებით:

ა) ჯანმრთელობის მდგომარეობის გამო სტაციონარულ სამედიცინო დაწესებულებაში არანაკლებ ერთი დღე-ღამით ყოფნის გამო;

ბ) ოჯახის წევრის (მეუღლე, დედა, მამა, და-ძმა, შვილი) გარდაცვალების გამო;

გ) დაუძლეველი ძალის გამო.

საინტერესოა ის ვადები, რომელიც ამ დროს აბიტურიენტს აქვს, საუბარია მხოლოდ სამ სამუშაო დღეზე და განმარტებულია, რომ ტესტირებაზე გამოუცხადებელმა აბიტურიენტმა სტაციონარულ დაწესებულებაში ყოფნის ან ოჯახის წევრის გარდაცვალების და ნათესაობის დამადასტურებელი დოკუმენტი უნდა წარმოადგინოს ცენტრში შესაბამისი საგამოცდო სესიის დასრულებიდან 3 სამუშაო დღის ვადაში.

დაგვიანების შემთხვევა:

“თუ აბიტურიენტმა დაუძლეველი ძალის გამო ვერ შეძლო საგამოცდო ბარათში მითითებულ დროს გამოცდაზე გამოცხადება, იგი ვალდებულია შესაბამისი საგამოცდო სესიის დასრულებიდან 3 სამუშაო დღის ვადაში ცენტრში წარმოადგინოს დასაბუთებული განცხადება და, არსებობის შემთხვევაში, განცხადებაში აღნიშნული გარემოებების დამადასტურებელი დოკუმენტაცია”, – ვკითხულობთ ბრძანებაში.

ასევე, დოკუმენტში გაწერილია კიდევ ერთი დამატებითი პუნქტი, რომლის მიხედვითაც ირკვევა, რომ  დამატებით სესიაზე (გამოცდაზე) გამოყენებულ ტესტში მიღებული ქულები არ გათანაბრდება. ამის შესახებ განმარტება EDU.ARIS.GE-სთან გასულ წელს, შეფასებისა და გამოცდების ეროვნული ცენტრის დირექტორმა სოფიო გორგოძემ გააკეთა.

ასევე იხილეთ:

ნანა ლოლაძე განმარტავს, რა შემთხვევაში განულდება აბიტურიენტის თხზულება ქართულში და რა უნდა იცოდეთ მოსაზრებების წერისას

გაწევრიანდი ჯგუფში “აბი გლუკოზა აბიტურიენტებისთვის” და გაიგე ყველა საჭირო სიახლე

განახლებადი ინფორმაცია გამოცდების შესახებ