როგორ უნდა მოემზადოთ ეროვნული სასწავლო ოლიმპიადისათვის – 2023-2024 სასწავლო წელი

სკოლის მოსწავლეებისთვის 2023-2024 სასწავლო წლის ეროვნულ სასწავლო ოლიმპიადაზე რეგისტრაცია 14 ნოემბრის ჩათვლით იქნება შესაძლებელი.

როგორც შეფასებისა და გამოცდების ეროვნული ცენტრი დღეს, 9 ნოემბერს გამოქვეყნებულ ინფორმაციაში განმარტავს, ოლიმპიადაში მონაწილეობის უფლება აქვს თითოეულ საგანში/საგნებში განსაზღვრული კონკრეტული ასაკობრივი ჯგუფის (X-XII კლასები) მოსწავლეს, თუმცა, სურვილის შემთხვევაში, საბაზო საფეხურის ნებისმიერ მსურველს.

გამოცხადდა მოსწავლეთა რეგისტრაცია ეროვნულ სასწავლო ოლიმპიადაში მონაწილეობისთვის – 2023-2024 სასწავლო წელი

გარდა ამისა, გამოცდების ცენტრი ოლიმპიადასთან დაკავშირებით მოსწავლეთა მხრიდან ხშირად დასმულ კითხვებზე პასუხს აქვეყნებს, საიდანაც ოლიმპიადაში მონაწილეობის მსურველებს მეტი ინფორმაციის მიღება შეუძლიათ:

სად და როგორ უნდა გავიაროთ რეგისტრაცია ეროვნული სასწავლო ოლიმპიადისათვის: ეროვნული სასწავლო ოლიმპიადისათვის რეგისტრაცია ონლაინ მიმდინარეობს. შეფასებისა და გამოცდების ეროვნულმა ცენტრმა რეგისტრაციისათვის შექმნა სპეციალური პროგრამა, რომელიც ამ პროცესს კიდევ უფრო გაამარტივებს. დეტალურ ინსტრუქციაში პროცესის სრული აღწერილობაა მოცემული.

ვის აქვს ოლიმპიადში მონაწილეობის უფლება: ოლიმპიადაში მონაწილეობის უფლება აქვს თითოეულ საგანში/საგნებში განსაზღვრული კონკრეტული ასაკობრივი ჯგუფის (X-XII კლასები) მოსწავლეს, თუმცა, სურვილის შემთხვევაში, საბაზო საფეხურის ნებისმიერ მსურველს.

რამდენი ქულა უნდა დავაგროვო მეორე ტურში გადასასვლელად: პირველი ტურის გამარჯვებულია, ანუ მეორე ტურში გადადის ის მონაწილე, რომელმაც დააგროვა ამა თუ იმ საგნის ტესტის მაქსიმალური ქულის არანაკლებ 60%-ისა და მოხვდა შესაბამისი კლასისა და საგნის რეიტინგული სიის პირველ 1000 მოსწავლეს შორის (ან მისი ქულა ემთხვევა რეიტინგულ სიაში მეათასე ადგილზე მყოფის ქულას).

როგორ მოვემზადოთ ოლიმპიადისათვის: ყველა საგნობრივ ტესტში გამოყენებული იქნება X, XI და XII კლასების სასწავლო მასალა. მოსწავლეები შეასრულებენ ერთ ტესტს ყველა საგანში, გარდა მათემატიკისა და ფიზიკისა. ამ ორ საგანში ცალკე იქნება ტესტი, რომელშიც მოცემული იქნება X კლასის მასალა და ცალკე – XI და XII კლასების საკითხები. ამდენად, მათემატიკასა და ფიზიკაში მოსწავლეს საშუალება ექნება აირჩიოს ორი ტესტიდან ერთ-ერთი და ის შეასრულოს.
დავალებების ტიპის გასაცნობად მოსწავლეს ასევე დაეხმარება წინა წლებში გამოყენებული ტესტები, რომელსაც შეგიძლიათ გაეცნოთ შეფასებისა და გამოცდების ეროვნული ცენტრის ვებგვერდზე.

როდის ტარდება ოლიმპიადა: ოლიმპიადის პირველი ტურის ჩატარება ნოემბერში, მეორე ტურის ჩატარება კი, სავარაუდოდ, იანვარში იგეგმება. ბოლო, მესამე ტური უკვე გაზაფხულზე ტარდება. კონკრეტული თარიღები მოგვიანებით გამოქვეყნდება.

პირველი ტური ისევ ონლაინ ჩატარდება: დიახ, ეროვნული სასწავლო ოლიმპიადის პირველი ტური წელსაც ონლაინ ფორმატით ტარდება. ბმული და ასევე დეტალური ინსტრუქცია შეფასებისა და გამოცდების ეროვნული ცენტრის ოფიციალურ ვებგვერდზე www.naec.ge ოლიმპიადის ჩატარების დღეს გამოქვეყნდება.

ვინ ხდება ოლიმპიადის გამარჯვებული: ოლიმპიადის გამარჯვებულნი იქნებიან ის მოსწავლეები, რომლებიც მესამე ტურში დააგროვებენ შესაბამისი საგნის ტესტის მაქსიმალური ქულის არანაკლებ 60%-ისა და რეიტინგულ სიაში გადანაწილდებიან პირველ ათ ადგილზე. გამარჯვებული იქნება ასევე ის მონაწილეც, რომლის ქულა დაემთხვევა რეიტინგულ სიაში მეათე ადგილზე მყოფი მოსწავლის ქულას.

გამოცდების ცენტრი განმარტავს, რომ თუ ოლიმპიადის მონაწილეთა რეიტინგული სიის პირველ ათ მონაწილეს ექნება თანაბარი ქულა, მაშინ, რეიტინგული სიის შექმნის მიზნით გათვალისწინებული იქნება თანაბარი ქულების მქონე მონაწილეების მეორე ტურში მიღებული შედეგები. საჭიროების შემთხვევაში კი პირველი ტურის შედეგებიც.

საუკეთესო შედეგების მქონე მოსწავლეები დიპლომებით, სიგელებითა და სპეციალური პრიზებით დაჯილდოვდებიან.