რომელი მიმართულების სტუდენტები მიიღებენ „მწვანე სტიპენდიებს“ – ორი სამინისტროს შეთანხმება

სოფლის მეურნეობის დეფიციტური სფეროების სამაგისტრო პროგრამების წარჩინებული სტუდენტებისთვის „მწვანე სტიპენდიები“ დაწესდება.

აღნიშნული სტიპენდია განათლებისა და მეცნიერებისა და გარემოს დაცვისა და სოფლის მეურნეობის სამინისტროებს შორის დადებული ურთიერთთანამშრომლობის მემორანდუმის ფარგლებში გაიცემა.

შეთანხმების მიხედვით, სამინისტროები სოფლის მეურნეობის დეფიციტური სფეროების საუნივერსიტეტო სწავლებაში განვითარებაზე იზრუნებენ.

„ხელი მოეწერა მემორანდუმს სამინისტროებს შორის, ასევე რვა უნივერსიტეტსა და გარემოსდაცვითი ინფორმაციისა და განათლების ცენტრს შორის, რაც არის ახალი პლატფორმა. ჩვენ ერთობლივი ძალებით შევუწყობთ ხელს გარემოსდაცვითი განათლების განვითარებას, როგორც საბაკალავრო, ისე სამაგისტრო პროგრამებზე. ასევე, გვემატება ახალი კომპონენტი „მწვანე სტიპენდიების“ რომელიც წაახალისებს სამაგისტრო პროგრამების სტუდენტებს,“ – განაცხადა სოლომონ პავლიაშვილმა, საქართველოს გარემოს დაცვისა და სოფლის მეურნეობის მინისტრის მოადგილემ 26 ივლისს.

როგორც განათლებისა და მეცნიერების სამინისტროს მიერ გავრცელებულ ინფორმაციაში ვკითხულობთ, სტიპენდიის აღება შეეძლებათ, გარემოსმცოდნეობის, ეკოლოგიის, ბუნებათსარგებლობის, გეოლოგიის, ჰიდროლოგიის, გარემოსდაცვის ტექნოლოგიების, აგრონომიისა და სოფლის მეურნეობის სხვა დარგების სამაგისტრო პროგრამების წარჩინებულ სტუდენტებს.

ასევე იხილეთ:

გრანტის მფლობელი სტუდენტები და სასამართლოში მათ წინააღმდეგ აღძრული საქმეები – რამდენად ეფექტურად მუშაობს განათლების საერთაშორისო ცენტრი?

მოამზადა გოგა ნიჟარაძემ