„SANGU-ს ფსიქოლოგიის პროგრამაში ღირებულად მივიჩნევ სწავლების კრეატიულ თავისებურებებს, რომლებსაც ლექტორები განსაზღვრავენ“

სტიპენდიანტობა, რა თქმა უნდა, დიდი შრომის შედეგია. პირველივე კურსზე ამ შედეგის მიღწევა სიამაყის გრძნობას უნდა ბადებდეს წარჩინებულ სტუდენტში, თუმცა როდესაც ბიზნესის კომპიუტინგის და სოციალურ მეცნიერებათა სკოლის, ფსიქოლოგიის საბაკალავრო პროგრამის სტიპენდიანტ მარიამ ონიანს ვესაუბრეთ, მას სიამაყე ვერ შევნიშნეთ. მარიამს წარმატებებზე საუბარი არ უყვარს, არც ის ავიწყდება, რომ ერთია სტუდენტის მონდომება და შრომა და მეორეა ამ ძალისხმევის დანახვა და დაფასება უნივერსიტეტის მხრიდან.

მთავარი კი მისთვის სხვა რამეა…

ყველაზე საშიში სიცოცხლის უქმად და უსარგებლოდ გატარებაა. მადლიერი ვიქნები, თუ შევძლებ ერთ ადამიანს მაინც გავუმარტივო ცხოვრება, ამიტომ ვცდილობ ვიშრომო საკუთარი თავის სრულყოფისა და გარშემომყოფთა კეთილდღეობისთვის. სტიპენდიანტობაც, ვფიქრობ, პირველყოვლისა იმის ნაწილია, რომ ვიყო კარგი შვილი ღირსეული მშობლებისთვის.

მარიამ, რატომ აირჩიე SANGU, რა იყო შენთვის მნიშვნელოვანი უნივერსიტეტის შერჩევისას, SANGU-ს შემთხვევაში რამ განაპირობა შენი არჩევანი?

SANGU-ს შესახებ თავად მოვიძიე ინფორმაცია სოციალური ქსელების მეშვეობით და პირველ ნომრად ავირჩიე. ზოგადად უნივერსიტეტის შერჩევისას ჩემთვის მნიშვნელოვანი იყო ის, თუ როგორი საბაკალავრო პროგრამა ჰქონდა მას იმ სპეციალობაში, რომლის დაუფლებაც მსურდა. სწორედ ამ ნიშნით ავირჩიე SANGU, რადგან ამ უნივერსიტეტის ფსიქოლოგიის საბაკალავრო და სამაგისტრო პროგრამები საკმაოდ კონკურენტუნარიანია.

თვითონ ფსიქოლოგია რატომ აირჩიე, როდის მიხვდი, რომ ამ სფეროში ხედავდი შენს თავს და ზოგადად მომავალს?

პროფესიის შერჩევისას ბევრი არც მიფიქრია, რადგან თავიდანვე ვიცოდი, რაც მინდოდა. თვითონ სიტყვა ფსიქოლოგიაც კი საკმაოდ დიდი ღირებულებითი მნიშვნელობისაა ჩემთვის. მე არ განვიხილავ მას, როგორც სფეროს. ჩემს წარმოსახვაში ის არის რაღაც, რაც გვასწავლის, როგორ ვიყოთ სასარგებლო საკუთარი თავისა და სამყაროსთვის. რაც შეეხება კითხვას, თუ როგორ ვხედავ მომავალს ამ სფეროში, ვიტყოდი, რომ ჩემთვის ყოველთვის უჩვეულოა მომავალთან დაკავშირებით დასმული კითხვები, რადგან მუდამ ორიენტირებული ვარ აწმყოზე, რომელიც თავისთავად განსაზღვრავს მომავალს.

უნივერსიტეტის არჩევისას რაღაცას ელიან ხოლმე მისგან, აქვთ მოლოდინი, რომელიც ხან მართლდება, ხან – არა. როდესაც SANGU აირჩიე გარკვეული მოლოდინი არ გქონია?

მოლოდინთან დაკავშირებით ასე ვფიქრობ, რომ მოლოდინი უნდა მქონდეს მხოლოდ საკუთარი თავისგან და არა სხვისგან. ასე იყო SANGU-ს შემთხვევაშიც, თუმცა სასიხარულოა ის ფაქტი, რომ თამამად შემიძლია ვთქვა, SANGU არის ადგილი, რომელიც გულგრილს არავის დატოვებს.

რა გამოარჩევს SANGU-ს ფსიქოლოგიის პროგრამას, რომელიც, როგორც მივხვდი, გაცნობისთანავე მოგეწონა. ახლა, როცა უკვე სწავლობ ამ პროგრამაზე, რას იტყოდი მის შესახებ?

უბრალოდ სიტყვები საკმარისი არ იქნება კვალიფიცირებული სპეციალისტების შესაფასებლად, რომლებიც მართლაც რომ ზრუნავენ სტუდენტებზე და ეს არ არის მხოლოდ სიტყვები. ეს არის ის, რაც ჩანს საქმეში და თუ არ გამოცდი, ვერც გაიგებ. SANGU-ს ფსიქოლოგიის პროგრამაში ღირებულად მივიჩნევ სწავლების პროცესის კრეატიულ თავისებურებებს, რომლებიც ინდივიდუალურია და მათ ლექტორები განსაზღვრავენ.

დიდი მადლობა მარიამ, წარმატებებს გისურვებთ.

დიდი მადლობა.

უნივერსიტეტის სხვა ამბები