ახალი სახელმძღვანელოები, რომლითაც შესაძლოა, მაღალკლასელებმა ისწავლონ – განხილვები დაიწყო

საქართველოს განათლებისა და მეცნიერების სამინისტრომ XI კლასის ყველა და X კლასის ზოგიერთი სახელმძღვანელოს შეფასებისა და საჯარო განხილვის პროცესი დაიწყო, რომლის ფარგლებშიც ყველა დაინტერესებულ პირს, მათ შორის, მშობლებს, მასწავლებლებს, განათლების სპეციალისტებსა და ორგანიზაციებს შესაძლებლობა ექნებათ, ჩაერთონ სახელმძღვანელოების მაკეტების (ანონიმური ეგზემპლარების) შეფასების პროცესში.

სახელმძღვანელოების რეცენზირების პროცესი 19 ივნისს დასრულდება და გრიფის მინიჭების შესახებ გადაწყვეტილება მიღებულ იქნება არაუგვიანეს 2023 წლის 20 ივნისისა. ზოგადსაგანმანათლებლო დაწესებულებების მიერ კი, სახელმძღვანელოების შერჩევა 22 ივნისიდან 2 ივლისის ჩათვლით განხორციელდება. იმ შემთხვევაში, თუ საგანში სამზე მეტი გრიფირებული სახელმძღვანელო გაივლის რეცენზირების ეტაპს, სკოლას ექნება შესაძლებლობა, არჩევანი რეიტინგის პირველი სამეულიდან გააკეთოს.

მიხეილ ჩხენკელის უწყების ინფორმაციით, ყველა სახელმძღვანელოს მაკეტი, 2 მარტიდან 31 მარტის ჩათვლით, გრიფირების ელექტრონულ პორტალზე – grifireba.emis.ge საჯაროდ იქნება განთავსებული, სადაც ნებისმიერ მსურველს ექნება საშუალება, გაეცნოს მისთვის საინტერესო საგნის/საგნების სახელმძღვანელოების მაკეტების შინაარსს და შესაბამის ველში დატოვოს კომენტარი.

“დაინტერესებული პირების მიერ პორტალზე დატოვებულ კომენტარებს განიხილავენ სახელმძღვანელოების რეცენზენტთა საგნობრივი ჯგუფები, რომლებიც დაკომპლექტებულია ეროვნული სასწავლო გეგმის ექსპერტის, პრაქტიკოსი მასწავლებლების, დარგის მეცნიერების, ფსიქოლოგის, ფილოლოგისა და სხვა სპეციალისტებისგან. არგუმენტირებული შენიშვნების შემთხვევაში, კომენტარების სახით დაფიქსირებული მოსაზრებები სახელმძღვანელოს საბოლოო რეცენზიაში აისახება, რაც თავის მხრივ გრიფის მინიჭების პროცესში ავტორისთვის სავალდებულო შესასრულებელი პირობა იქნება”, – ვკითხულობთ უწყების ინფორმაციაში.

მათივე ცნობით, სახელმძღვანელოების გრიფირების შესახებ განცხადების მიღების დასრულების შემდეგ, შესული განაცხადებიდან 41-მა წარმატებით გაიარა შემოწმება და რეცენზირების ეტაპზე გადავიდა.

ასევე იხილეთ:

საქართველოს ისტორია ცალკე საგნად – პოპულისტური ნაბიჯი თუ რეალური ცვლილება?

„შეიძლება, განათლების სისტემას მატყუარა ადამიანები მართავდნენ და მათ ვთხოვდეთ, ჩვენი შვილები სკოლებში პატიოსნად ცხოვრებას სწავლობდნენ?“

„განათლების სისტემა საქართველოში გამოსაცვლელია…“ – რა კითხვამ გააღიზიანა პარლამენტში მიხეილ ჩხენკელი