სტუდენტთა მობილობისთვის რეგისტრაცია დაიწყო – 2023-2024 სასწავლო წლის შემოდგომის სემესტრი

2023-2024 სასწავლო წლის შემოდგომის სემესტრისთვის მობილობის მსურველ სტუდენტთა რეგისტრაცია ელექტრონულ პორტალზე 21 აგვისტოდან დაიწყო და 2023 წლის 7 სექტემბრის 18:00 საათამდე გაგრძელდება. მობილობის ელექტრონულ პორტალზე რეგისტრაციისთვის გადადით შემდეგ ბმულზე students.emis.ge

როგორც EDU.ARIS.GE– მ 18 აგვისტოს გაარკვია, პორტალზე ვაკანტური ადგილები 12:00 საათიდან უნდა გამოჩნდეს.

მობილობის ვიდეო ინსტრუქცია

განათლების მართვის საინფორმაციო სისტემის ცნობით, მობილობის შედეგების ნახვა სტუდენტების მიერ შესაძლებელი იქნება 2023 წლის 11 სექტემბერს.

გაითვალისწინეთ, რომ სტუდენტები, რომლებიც უმაღლეს საგანმანათლებლო დაწესებულებებში ჩაირიცხნენ 2020 და შემდგომი წლების ერთიანი ეროვნული გამოცდების საფუძველზე და სურთ მობილობით სარგებლობა, უნდა აკმაყოფილებდნენ მიმღები პროგრამის დაშვების წინაპირობებს და ერთიან ეროვნულ გამოცდებზე ჩაბარებული უნდა ჰქონდეთ შესაბამისი სავალდებული საგანი/საგნები (გადალახული უნდა ჰქონდეს მინიმალური კომპეტენციის ზღვარი).

ასევე, განათლების მართვის საინფორმაციო სისტემის ცნობით, სსიპ – დავით აღმაშენებლის სახელობის საქართველოს ეროვნული თავდაცვის აკადემიის სტუდენტებს, რომლებიც 2022 წელს ჩაირიცხნენ აღნიშნულ საგანმანათლებლო დაწესებულებაში და სტატუსი შეუჩერდათ ან/და შეუწყდათ „უმაღლესი განათლების შესახებ“ საქართველოს კანონის 43-ე მუხლის მე-15 პუნქტის „გ“ ქვეპუნქტში მითითებული საფუძვლებით, მობილობის უფლება წარმოეშობათ უმაღლესი განათლების შესაბამის საფეხურზე სწავლის ხანგრძლივობის მიუხედავად.

სახელოვნებო-შემოქმედებით და სასპორტო საგანმანათლებლო პროგრამაზე მობილობის მსურველი წინასწარ გადის კონკურსს დაწესებულების მიერ განსაზღვრულ ვადებში მის მიერ დადგენილი წესითა და პირობებით. სტუდენტმა კონკურსის პირობების შესახებ ინფორმაციის დაზუსტების მიზნით უნდა მიმართოს თავად უმაღლეს საგანმანათლებლო დაწესებულებას.