თსუ-ში რექტორის მოვალეობის შემსრულებლის არჩევნები 20 ოქტომბერს ჩატარდება

დღეს, 10 ოქტომბერს, გამოქვეყნდა თსუ აკადემიური საბჭოს დადგენილება რექტორის მოვალეობის შემსრულებლის არჩევნებთან დაკავშირებით.

ივანე ჯავახიშვილის სახელობის თბილისის სახელმწიფო უნივერსიტეტის აკადემიური საბჭოს დადგენილებით, თსუ რექტორის მოვალეობის შემსრულებლის თანამდებობის დასაკავებლად არჩევნები 20 ოქტომბერს ჩატარდება.

თსუ რექტორის მოვალეობის შემსრულებლის კანდიდატთა რეგისტრაცია კი 11 ოქტომბრის 10.00 საათზე დაიწყება და გაგრძელდება 13 ოქტომბრის 18.00 საათამდე. კანდიდატების განაცხადების განხილვის შემდეგ, რექტორის მოვალეობის შემსრულებელს აკადემიური საბჭო ფარული კენჭისყრით, სიითი შემადგენლობის უმრავლესობით, არაუმეტეს 6 თვის ვადით აირჩევს.

ვის შეუძლია კონკურსში მონაწილეობა:

თსუ რექტორის მოვალეობის შემსრულებლის თანამდებობის დასაკავებლად კონკურსში მონაწილეობის მიღება შეუძლია პირს, რომელსაც აქვს დოქტორის ან მასთან გათანაბრებული აკადემიური ხარისხი. კანდიდატმა სხვა საბუთებთან ერთად უნდა წარმოადგინოს უნივერსიტეტის განვითარების მოკლევადიანი სამოქმედო გეგმა.

შეგახსენებთ, რომ თსუ რექტორმა გიორგი შარვაშიძემ თანამდებობიდან გადადგომის თაობაზე აკადემიურ საბჭოს 7 ოქტომბერს მიმართა. უნივერსიტეტის ინფორმაციით, გიორგი შარვაშიძე რექტორის მოვალეობას 15 ოქტომბრამდე შეასრულებს.

გიორგი შარვაშიძე ივანე ჯავახიშვილის სახელობის თბილისის სახელმწიფო უნივერსიტეტის რექტორის თანამდებობაზე პირველი ვადით 2016 წელს, ხოლო მეორე ვადით – 2020 წელს აირჩა.