20 საჯარო სკოლის პროექტირება-რეაბილიტაციისთვის ტენდერი გამოცხადდა – სკოლების სია

ინფრასტრუქტურის სამინისტროს მუნიციპალური განვითარების ფონდმა საქართველოს მასშტაბით 20 საჯარო სკოლის პროექტირება-რეაბილიტაციის ტენდერები გამოაცხადა.

მუნიციპალური განვითარების ფონდის მიერ 31 აგვისტოს გამოქვეყნებული ინფორმაციით, გათვალისწინებულია სკოლების შენობების ტექნიკური მდგომარეობის ექსპერტიზის დასკვნების საფუძველზე განახლების დეტალური გეგმის მომზადება, რაც როგორც სრულ რეაბილიტაციას, ასევე საჭიროების შემთხვევაში, გამაგრების სამუშაოებს მოიცავს.

რომელ სკოლებს ეხება ტენდერი

პროექტები მოიცავს მესტიის, წყალტუბოს, ყვარლის, ზუგდიდის, დუშეთის, მცხეთის, კასპის, გორის, ქედის, ბორჯომის, საგარეჯოს, ახმეტის, ახალქალაქის მუნიციპალიტეტებში და თბილისში მდებარე სკოლების აღდგენით სამუშაოებს.

მათ შორისაა დაბა მესტიის №1, სოფლების – საყულიის, ჭიკაანის , საბუეს, ახალსოფლის N2, დარჩელის N2, ქვეშეთის, ბაზალეთის, საკრამულის, ქსოვრისის, ლამისყანის, უფლისციხის, წონიარისის, უდაბნოს, ვაჩიანის, დაბა ახალდაბის, ბორჯომის N3, ახმეტის №2, წყალტუბოს №3 და თბილისის №221 (კომაროვის სახელობის სკოლის დიდი დიღმის ფილიალი) საჯარო სკოლები.

რა უნდა გაკეთდეს სკოლებში

მუნიციპალური განვითარების ფონდის ინფორმაციით, პროექტების ფარგლებში მოწესრიგდება სკოლების ძირითადი ინფრასტრუქტურა, განახლდება სასწავლო და ადმინისტრაციული სივრცეები და ადაპტირდება თანამედროვე საგანმანათლებლო პროცესის მოთხოვნების შესაბამისად. განსაკუთრებული ყურადღება დაეთმობა საინჟინრო კომუნიკაციების გაუმჯობესებას – გათბობის, ვენტილაციისა და წყალმომარაგების სისტემების განახლებას.