„2024 წლის სექტემბრიდან ახალგორში ქართულ ენაზე სწავლა სრულად შეწყდება“

DRI – დემოკრატიის კვლევის ინსტიტუტის მიერ (რომლის დამფუძნებელიც საქართველოს ყოფილი სახალხო დამცვლი, უჩა ნანუაშვილია), დღეს, 1-ელ აგვისტოს გამოქვეყნდა ინფორმაცია, რომლის თანახმად 2024 წლის სექტემბრიდან ახალგორში ქართულ ენაზე სწავლა სრულად შეწყდება.

ვიდრე ორგანიზაციის განცხადებას და მათ მიერ დადგენილ გარემოებებს უცვლელად შემოგთავაზებთ, შეგახსენებთ, რას წერს საკუთრ უახლეს კვლევაში ახალგორის სკოლებისა და იქ მიმდინარე პროცესის შესახებ დღევანდელი სახალხო დამცველი, ლევან იოსელიანი:

“რაც შეეხება ოკუპირებულ ახალგორს, ამ ეტაპზე, ფუნქციონირებს მხოლოდ 6 ქართული სკოლა. აქედან, 5 სკოლაში მშობლიურ ენაზე სწავლა მიმდინარეობს მხოლოდ მე-11 კლასში. დანარჩენ შემთხვევაში ქართული ენა ისწავლება, როგორც უცხო ენის საგანი. 2023 სასწავლო წლის მონაცემებით, ახალგორის ქართულ სკოლებში, ჯამურად 36 მოსწავლე ირიცხება და 91 პედაგოგია დასაქმებული. 2022 წელს 53 მოსწავლე და 108 პედაგოგი იყო. ყოველივე ეს მდგომარეობის კიდევ უფრო გაუარესებაზე მიუთითებს”.

„საქართველოს ისტორიის ნაცვლად, რუსულ ენაზე ასწავლიან აფხაზეთის ისტორიას“ – სახალხო დამცველი ოკუპირებულ ტერიტორიებზე

EDU.ARIS.GE უცვლელად წარმოგიდგენთ დემოკრატიის კვლევის ინსტიტუტის მიერ დღეს გამოქვეყნებულ ინფორმაციას:

“ოკუპირებულ ტერიტორიებზე ეთნიკური ქართველების გაუსაძლისი ყოფა, სადაც ადამიანები გადარჩენისთვის იბრძვიან, ამ რეგიონების ქართველებისგან დაცლის რეალურ საფრთხეს ქმნის. ფიზიკური და ეკონომიკური უსაფრთხოების განცდის არარსებობა, ეთნიკური ნიშნით დისკრიმინაცია, სისტემური კორუფცია, ყოველდღიური ყოფიდან და განათლებიდან მიზანმიმართულად და თანმიმდევრულად განდევნილი ქართული ენა ეთნიკური ქართველები ყოველდღიურობის არასრულ ჩამონათვალს წარმოადგენს.

ოკუპირებული ახალგორის რაიონი გამონაკლისი არაა. ოფიციალური მონაცემების არარსებობის პირობებში, ადგილობრივი მოსახლეობის შეფასებით, 2008 წლის ომის შემდეგ, რაიონი მოსახლეობის 90 პროცენტმა დატოვა. ის, რომ ახალგორი მოსახლეობისგან ფაქტობრივად დაიცალა, არსებული საგანმანათლებლო დაწესებულებების რაოდენობაში და განათლების ხარისხში ჩანს.

ოკუპირებული ახალგორის რაიონში მოქმედი ექვსი სკოლიდან (იკოთში, ბოლში, კორინთაში და ბალაანში), 2024 წლის სექტემბრიდან ორი – კორინთისა და ბოლის სკოლები დაიხურება. ოფიციალური მიზეზი მოსწავლეების არარსებობაა. ორივე საგანმანათლებლო დაწესებულება 9 კლასიანია. სოფელ ბოლის სკოლა ახალგორის სკოლის ფილიალია, ხოლო კორინთის – სოფელ იკოთის. ბოლის სკოლა დაბიდან დაახლოებით 1,5 კილომეტრით არის დაშორებული და იმის გამო, რომ მისი მუშაობა შეენარჩუნებინათ, სკოლაში დასაქმებული პედაგოგების შვილები იქ დაბიდან დადიოდნენ. მათ 9 კლასი უკვე დაამთავრეს.

მოსწავლეების არარსებობის ოფიციალური მიზეზის მიღმა, სკოლების დახურვის უკან ოკუპირებულ ახალგორში ზოგადსაგანმანათლებლო დაწესებულებების მოსწავლეებისა და მათი ოჯახების გაუსაძლისი ყოფა დგას. თუ ახალგორის სკოლებში სწავლა 2017 წლამდე ქართულ ენაზე, ქართული სასწავლო პროგრამით მიმდინარეობდა, 2017 წლის სექტემბრიდან სწავლება სრულად რუსულით ჩანაცვლდა. ახალგორში წლევანდელი დამამთავრებელი კლასი უკანასკნელი იყო, რომელიც განათლებას ქართულ ენაზე იღებდა. დემოკრატიის კვლევის ინსტიტუტი ადრეც წერდა, რომ სწავლების რუსულ ენაზე გადასვლამ ახალგორში განათლების ხარისხი სერიოზულად გააუარესა. მოსწავლეებს რუსულ ენაზე სწავლა, ხოლო მასწავლებლებს საგნების რუსულ ენაზე სწავლება უჭირთ.

მასწავლებლების აბსოლუტური უმრავლესობა ეთნიკურად ქართველია და განათლება ქართულ ენაზე აქვს მიღებული. ცხინვალის უშიშროების დე ფაქტო სამსახური ამ გარემოებას ახალგორის სკოლების ეთნიკურად ქართველი და არალოიალური პედაგოგების მოსაშორებლად შეიძლება იყენებდეს. მაგალითად, ადგილობრივ მოსახლეობას ახალგორის ერთ-ერთი სკოლის პედაგოგის გათავისუფლების მიზეზად დასახელებული რუსული ენის არცოდნა სარწმუნოდ არ მიაჩნია. გათავისუფლების მიზეზი დამაჯერებლად არ გამოიყურება იმ ფონზეც, რომ პედაგოგი რუსულ ენაზე საგანს აქამდეც ასწავლიდა, მის შემცვლელად კი, „კაგებე“-სთან დაახლოებული პირი მოიაზრება.

მშობლიურ ენაზე განათლების მიღების უფლების წართმევა არღვევს ხარისხიანი განათლების მიღებისა და განათლების ხელმისაწვდომობის უფლებას. ევროპის ადამიანის უფლებათა ევროპული სასამართლოს მიერ დადგენილი პრეცედენტული სამართლის თანახმად, მიუხედავად იმისა, რომ საქართველო ვერ ახორციელებს ეფექტიან კონტროლს ოკუპირებული ცხინვალის რეგიონში, საქართველოს სახელმწიფო ვალდებულია გააქტიუროს პოლიტიკური, სამართლებრივი და დიპლომატიური ძალისხმევა ახალგორის რაიონის მოსახლეობისთვის მშობლიურ ენაზე განათლების მიღების უზრუნველსაყოფად”, – წერია ინფორმაციაში.