ალტე უნივერსიტეტი ყოველწლიურ სასკოლო „Start-up მარათონს“ იწყებს

ალტე უნივერსიტეტი იწყებს ყოველწლიურ სასკოლო „Start-up მარათონს“.

უნივერსიტეტის მიერ 6 თებერვალს გამოქვეყნებული ინფორმაციით, „Start-up მარათონში“ მონაწილეობის მიღება შეუძლიათ, საქართველოს ნებისმიერი კუთხიდან X, XI ან XII კლასის მოსწავლეებს, რომლებსაც საინტერესო, ინოვაციური Start-up იდეები აქვთ.

მოსწავლეებმა უნდა შექმნან 3-4 მოსწავლისგან დაკომპლექტებული გუნდი, ჩაერთონ მარათონში და განახორციელონ ან განავითარონ საკუთარი იდეა პროფესიონალ მენტორებთან ერთად.

„Start-up მარათონი“ მათ აძლევს შესაძლებლობას, გაიგონ, რა არის მეწარმეობა და რა ეტაპებს გადის იდეა, სანამ რეალობად იქცევა. ისინი შეძლებენ, განივითარონ გუნდური მუშაობის, ინოვაციური ხედვისა და რესურსების ეფექტურად მართვის უნარები.

პროექტის ეტაპები:

• ინოვაციური ბიზნეს-იდეების და მონაწილეების რეგისტრაცია;
• იდეების გადარჩევა;
• ტრენინგ-სესიები შერჩეული იდეების ავტორებისთვის;
• მენტორინგი;
• ფინალური ღონისძიება – გამარჯვებული იდეების გამოვლენა.

პრიზები:

წელს პროექტს კიდევ უფრო მასშტაბური სახე აქვს და მისი საპრიზო ფონდი 13 000 ლარია.

• ალტე უნივერსიტეტი რჩეული იდეის ავტორს გადასცემს ფულად პრიზს 5 000 ლარის ოდენობით იდეის განხორციელების მხარდასაჭერად. გარდა ამისა, „ინოვაციებისა და მეწარმეობის ცენტრის“ სერვისების მეშვეობით, დაეხმარება იდეის განვითარებასა და ინვესტორების მოძიებაში;
• პროექტის გენერალური სპონსორი ლიბერთი ბანკი თავის რჩეულ პროექტს 5 000 ლარით დააფინანსებს. ფინანსური მხარდაჭერის გარდა, ლიბერთი მონაწილეებს შესთავაზებს სტაჟირებას (3 მოსწავლე), სპეციალურად გოგოებისთვის შექმნილ ლიდერშიპის ტრენინგს, წვდომას ლიბერთის LMS სასწავლო პლატფორმაზე, AI-ის მიმართულებით მასტერკლასებსა და სოც.მედია მხარდაჭერას;
• პროექტის სპონსორი Easy pay რჩეულ გუნდს გადასცემს 3 000 ლარს;
• კომპანია FINO თავის რჩეულ გუნდს გადასცემს 3 000 ლარის ღირებულების სერვის პაკეტს;
• Entrepreneur Georgia თავის რჩეულ იდეას მედია მხარდაჭერას გაუწევს;
• GITA რჩეული იდეის ავტორს დაეხმარება პროტოტიპის შექმნაში.

„Start-up მარათონში“ მონაწილეობის მსურველები რეგისტრაციის გავლას შეძლებენ აღნიშნულ ბმულზე

რეგისტრაცია 27 თებერვლის ჩათვლით გაგრძელდება.

უნივერსიტეტის სხვა ამბები