CIU-ში მოსწავლეებისა და აბიტურიენტებისთვის საგანმანათლებლო-პრაქტიკულ ღონისძიებათა ციკლი გაიმართა

კავკასიის საერთაშორისო უნივერსიტეტის (CIU) საზოგადოებასთან ურთიერთობის სამსახურისა და მედიცინის ფაკულტეტის ორგანიზებით, მოსწავლეებისა და აბიტურიენტებისთვის საგანმანათლებლო-პრაქტიკულ ღონისძიებათა ციკლი გაიმართა.

უნივერსიტეტის მიერ 14 მაისს გამოქვეყნებული ინფორმაციით, პროექტის მიზანს მედიცინის სფეროთი დაინტერესებული ახალგაზრდების პროფესიული ორიენტაცია და დარგობრივი ცოდნის პოპულარიზაცია წარმოადგენდა.

საგანმანათლებლო აქტივობები რამდენიმე ძირითად მიმართულებას მოიცავდა: ასოცირებულმა პროფესორმა, თამარ სუპატაშვილმა, წარადგინა პრაქტიკული შემთხვევებით დატვირთული აქტივობა თემაზე: „ქიმია შიშის გარეშე: ყოველდღიურობიდან პროფესიამდე“.

„პირველადი გადაუდებელი დახმარება“ – სესიას, რომელიც გადაუდებელი სამედიცინო დახმარების საფუძვლებს დაეთმო, მოწვეული პროფესორი ლუკა ბერიძე და მედიცინის ფაკულტეტის სტუდენტები – თეონა კოშაძე და გიორგი მარიამიძე უძღვებოდნენ.

„ანატომია ახალი თვალით“ – მოწვეულმა პროფესორმა, გიორგი აფციაურმა, აუდიტორიას ანატომიის სწავლების თანამედროვე პერსპექტივები გააცნო, ხოლო ასისტენტ-პროფესორმა, კოკა კაჭარავამ, დეტალურად განიხილა წამლის ფარმაკოკინეტიკის საკითხები თემაზე – „წამლის მოგზაურობა ორგანიზმში“.

აღნიშნული ინიციატივა მონაწილეებს შესაძლებლობას აძლევს, თეორიულ ცოდნასთან ერთად, გაეცნონ სამედიცინო განათლების პრაქტიკულ ასპექტებს და დარგის სპეციალისტებისგან კომპეტენტური ინფორმაცია მიიღონ.

უნივერსიტეტის სხვა ამბები