დადგინდა, რომელ სახელმწიფო უნივერსიტეტს რა საგანმანათლებლო პროგრამების (კურიკულუმების) განხორციელების უფლება აქვს – ჩამონათვალი

საქართველოს მთავრობის 20 მაისის დადგენილებით განისაზღვრა იმ საგანმანათლებლო პროგრამების (კურიკულუმების) ჩამონათვალი, რომელთა განხორციელების უფლებაც სახელმწიფოს მიერ დაფუძნებულ უმაღლეს საგანმანათლებლო დაწესებულებებს აქვთ.

დოკუმენტში, რომელსაც ხელს აწერს პრემიერ-მინისტრი ირაკლი კობახიძე და რომელიც ძალაშია დღეიდან, 22 მაისიდან, ნათქვამია, რომ სახელმწიფოს მიერ დაფუძნებულ უმაღლეს საგანმანათლებლო დაწესებულებებს უფლება აქვთ, განახორციელონ:

მასწავლებლის მომზადების, სპეციალური მასწავლებლის მომზადების, ვეტერინარის მომზადების, ქართულ ენაში მომზადებისა და დოქტორანტურის აკრედიტებული საგანმანათლებლო პროგრამები, რომლებსაც ახორციელებდნენ ამ დადგენილების ამოქმედების მომენტისათვის;

მასწავლებლის მომზადების, სპეციალური მასწავლებლის მომზადების, ვეტერინარის მომზადების, ქართულ ენაში მომზადებისა და დოქტორანტურის ის საგანმანათლებლო პროგრამები, რომლებიც ამ დადგენილების ამოქმედების მომენტისათვის აკრედიტებულია ან აკრედიტაციის პროცესშია და მიენიჭება აკრედიტაცია/პირობითი აკრედიტაცია.

მთავრობის ახალი დადგენილებით ასევე განისაზღვრა, რომ სახელმწიფოს მიერ დაფუძნებულ უმაღლეს საგანმანათლებლო დაწესებულებებს ეძლევათ უფლება, ის საგანმანათლებლო პროგრამები, რომლებსაც ისინი, 2026 წლის 1-ელი იანვრის მდგომარეობით, საქართველოს კანონმდებლობის შესაბამისად ახორციელებენ (რომლებიც გათვალისწინებული არ არის ამ დადგენილების პირველი მუხლით), დარჩენილი ვადის მიუხედავად, აკრედიტებულ ან არააკრედიტებულ (ავტორიზებულ) რეჟიმში განახორციელონ „უმაღლესი განათლების შესახებ“ საქართველოს კანონის 89​21 მუხლით დადგენილი ვადების დაცვით.

იხილეთ ჩამონათვალი:

მთავრობის დადგენილება და მაგისტრატურის, ასევე ბაკალავრიატისა და ერთსაფეხურიანი საგანმანათლებლო პროგრამების სრული ჩამონათვალი

გარდა ამისა, სახელმწიფოს მიერ დაფუძნებული უმაღლესი საგანმანათლებლო დაწესებულებები, რომელთაც სურთ, ავტორიზაციის პროცესში დაიმატონ ან/და აკრედიტაციაზე წარადგინონ საგანმანათლებლო პროგრამა (რომელიც გათვალისწინებული არ არის ამ დადგენილების პირველი მუხლით), ვალდებულნი არიან, ავტორიზაციის/აკრედიტაციის განაცხადის სსიპ − განათლების ხარისხის განვითარების ეროვნულ ცენტრში წარდგენამდე, წინასწარი თანხმობის მიღების მიზნით, მიმართონ საქართველოს განათლების, მეცნიერებისა და ახალგაზრდობის სამინისტროს.