ეროტიული თუ ეროტიკული? დინამიური თუ დინამიკური? ელემენტარული თუ ელემენტალური?
გრამატიკულ ცნობარში ამჯერად ურ/ულ ბოლოსართით ნაწარმოები ზოგიერთი სახელის მართლწერას მიმოვიხილავთ.
საგნის თვისების ან წარმომავლობის სახელთა საწარმოებლად ყველაზე ხშირად გამოიყენება -ურ ბოლოსართი. ის არსებითი სახელის ფუძეს დაერთვის და ახალ სიტყვას აწარმოებს:
კაცი-კაცური
სტუდენტი – სტუდენტური
სვანი – სვანური
ფიზიკა – ფიზიკური
შეცდომები მაშინ იჩენს თავს, როდესაც -იკა კომპლექსზე ფუძეგათავებულ სახელთაგან აწარმოებენ ზედსართავ სახელებს ისე, რომ არ ითვალისწინებენ თავდაპირველ დაწერილობას. ამის შედეგად წერითი თუ ზეპირი მეტყველების დროს ხშირად პარალელურად იყენებენ ორ ფორმას, რომელთაგან ერთი მცდარია:
დინამიური და დინამიკური
ეროტიული და ეროტიკული
რომანტიული და რომანტიკული
იმისთვის, რომ შეცდომა არ დავუშვათ, უნდა გვახსოვდეს:
თუ სახელის ფუძე -იკა კომპლექსზე თავდება, ზედსართავის დაბოლოებად მივიღებთ -იკურ/იკულ ფორმას. შესაბამისად, სწორია:
დინამიკური ( დინამიკა)
ეროტიკული ( ეროტიკა)
რომანტიკული ( რომანტიკა)
ფსიქიკური ( ფსიქიკა)
ლირიკული ( ლირიკა)
თუ სიტყვის ძირში, ბოლოსართთან ახლოს, რ თანხმოვანი წერია, მაშინ სიტყვას ულ სუფიქსი დაერთვის, თუ ლ თანხმოვანი, მაშინ – ურ ბოლოსართი უნდა ვიხმაროთ.
არასწორია: დინამიური; ეროტიული; ლირიული; ფსიქიური; ელემენტალური
სწორია: დინამიკური; ეროტიკული; ლირიკული; ფსიქიკური; ელემენტარული
გრამატიკული ცნობარის სხვა გაკვეთილები
რუბრიკის ავტორი: ნინო ლომიძე, ფილოლოგი
- სახელმწიფო ენის ექსპერტებმა ქართულ ენაზე რამდენიმე ქვეყნის სახელწოდება შეცვალეს – სწორი ფორმები by გრამატიკული ცნობარი
- გამეორება, როგორც მხატვრული ხერხი – მაგალითები და სავარჯიშო მეცადინეობისთვის by გრამატიკული ცნობარი
- ჰიპერბოლა, ლიტოტესი და გაპიროვნება – მაგალითები და სავარჯიშო მეცადინეობისთვის by გრამატიკული ცნობარი