გაფრთხილება მათ, ვინც ე.წ. უფასო ფაკულტეტზე სწავლას გეგმავს – განათლების სამინისტროს განმარტება

სახელმწიფოს მიერ დაფინანსებული უმაღლესი საგანმანათლებლო პროგრამების ნუსხა გუშინ გამოქვეყნდა და დღეს, 19 ივლისს, საქართველოს განათლების, მეცნიერებისა და ახალგაზრდობის სამინისტრომ განმარტა, რომ ე.წ. უფასო ფაკულტეტზე ჩარიცხვის შემდეგ, მომდევნო წლების სწავლის დაფინანსება სტუდენტს კონკრეტული დათქმის შემთხვევაში მიეცემა:

“2024-2025 წელს სახელმწიფოს მიერ დაფინანსებულ უმაღლეს საგანმანათლებლო პროგრამაზე ჩარიცხული სტუდენტი მომდევნო სასწავლო წლებში ამ პროგრამის ფარგლებში უზრუნველყოფილი იქნება სახელმწიფო დაფინანსებით მხოლოდ იმ შემთხვევაში თუ წინა სასწავლო წელს ათვისებული ექნება აღნიშნული პროგრამებით გათვალისწინებული არანაკლებ 45 კრედიტი. ბოლო სასწავლო წელს სტუდენტი ამ პროგრამის ფარგლებში უზრუნველყოფილი იქნება სახელმწიფო დაფინანსებით იმ შემთხვევაში, თუ ათვისებული ექნება ბაკალავრიატში არანაკლებ 180 კრედიტი, ხოლო მასწავლებლის მომზადების ინტეგრირებულ საბაკალავრო-სამაგისტრო/ვეტერინარიის ინტეგრირებულ სამაგისტრო პროგრამაზე – არანაკლებ 240 კრედიტი”, – აცხადებენ გიორგი ამილახვარის უწყებაში.

სტუდენტის სწავლა ე.წ. უფასო ფაკულტეტზე კონკრეტული დათქმით დაფინანსდება – რა ცვლილებებს აანონსებს განათლების სამინისტრო

ცნობისთვის, საგანმანათლებლო პროგრამებზე სრულად დაფინანსებული ადგილების რაოდენობის შესახებ დეტალური ინფორმაციისათვის უნდა მიმართოთ უშუალოდ უმაღლეს საგანმანათლებლო დაწესებულებებს.

ამავე თემაზე:

გამოქვეყნდა საგანმანათლებლო პროგრამები, რომლებზე სწავლას სრულად აფინანსებს სახელმწიფო – ე.წ. უფასო ფაკულტეტები 2024-2025