„გულდამძიმებული მოგმართავთ“ – 5 შვილის დედის წერილი განათლების სამინისტროს, პარლამენტსა და სახალხო დამცველს

5 მოსწავლის მშობელმა მარიამ საკანდელიძემ დღეს, 3 აპრილს, ოთხ სხვადასხვა უწყებას წერილით მიმართა, რომელშიც ის მოუწოდებს საქართველოს განათლების, მეცნიერებისა და ახალგაზრდობის სამინისტროს, საქართველოს სახალხო დამცველს, საქართველოს პარლამენტის განათლების, მეცნიერებისა და ახალგაზრდულ საქმეთა კომიტეტსა და განათლების ხარისხის განვითარების ეროვნულ ცენტრს, რომ პრიორიტეტი მიენიჭოს მოსწავლეების კეთილდღეობასა და აკადემიურ წარმატებას, მიღებულ იქნას გადამწყვეტი ზომები უფრო სამართლიანი და ინკლუზიური განათლების სისტემის შესაქმნელად.

„გულდამძიმებული მოგმართავთ საქართველოში საშუალო განათლების სავალალო მდგომარეობასთან დაკავშირებით. როგორც ზოგადსაგანმანათლებლო საშუალო სკოლის 5 მოსწავლის მშობელი, თავს ვალდებულად ვთვლი ყურადღება გავამახვილო საჯარო სკოლებში არსებულ საკითხებზე, რომლებიც მიმაჩნია საგანგაშოდ. ნება მომეცით გამოვყო რამდენიმე ძირითადი საკითხი:

1. გადატვირთული საკლასო ოთახები. კლასებში მოსწავლეთა რაოდენობა საგანგაშოა, (დაახლოებით 25-დან 35 მოსწავლემდე). მოსწავლეთა სიჭარბე დამაბრკოლებელი ფაქტორია მასწავლებლისთვის, რათა სათანადო ყურადღება დაუთმოს თითოეულ მოსწავლეს და გამოიყენოს ინდივიდუალური მიდგომები. იკარგება სწავლების მოტივაცია და იქმნება კომპრომისული სასწავლო გარემო.

2. დამხმარე რესურსების დეფიციტი. სკოლებს საგრძნობლად აკლია ან თითქმის არ გააჩნია დამხმარე რესურსები, რათა სასწავლო პროცესი იყოს საინტერესო და შინაარსიანი და პედაგოგს გაუადვილდეს მოსწავლის ინტერესის აღძვრა და შენარჩუნება. არ ფუნქციონირებს ქიმიისა და ფიზიკის ლაბორატორიები, რაც ართულებს მოსწავლეების მიერ აღნიშნული დისციპლინების დაძლევას.

3. ინდივიდუალური მიდგომების არარსებობა. მასწავლებლები ვერ იყენებენ ინდივიდუალურ მიდგომებს თითოეული მოსწავლის მიმართ. დამკვიდრებულია სწავლების ერთიანი მეთოდოლოგია, რომელიც არ ითვალისწინებს სტუდენტების მრავალფეროვან საჭიროებებსა და სწავლის სტილს.

4. ურთიერთპატივისცემისა და კვალიფიკაციის ნაკლებობა. მოსწავლეებსა და მასწავლებლებს შორის არსებობს პატივისცემის დეფიციტი, რაც გამოწვეულია იმით, რომ ბევრ პედაგოგს არ გააჩნია საჭირო კვალიფიკაცია და უნარები, რათა მოსწავლეს აღუძრას ინტერესი გაკვეთილისა და საგნის მიმართ, შეინარჩუნოს მისი ყურადღება და ეფექტურად ჩართოს საგაკვეთილო პროცესში, რასაც მივყავართ დისციპლინის დარღვევავდე და ურთიერთშეურაცხმყოფელ ქმედებებამდე.

5. ფსიქოლოგიური და ემოციური გავლენა. განათლების სისტემა, რომელიც არ აკმაყოფილებს სტანდარტებს იწვევს ფსიქოლოგიურ და ემოციურ პრობლემებს მოსწავლეებში. ისინი კარგავენ სკოლაში სიარულის ინტერესს, რაც აისახება მათ აკადემიურ მოსწრებაზე და საერთო კეთილდღეობაზე. ამის დასტურია მოსწავლეთა მეტისმეტად მაღალი მიმართვიანობა მანდატურის სამსახურის ფსიქოლოგიურ ცენტრში.

6. დამქანცველი განრიგი. სკოლაში გატარებული 5 თუ 6 საათის შემდეგ, მოსწავლეებს უწევთ კერძო რეპეტიტორებთან და კლასგარეშე აქტივობებზე სიარული, რაც იწვევს ბავშვების ფიზიკურ და გონებრივ გადაღლას. მათ არასაკმარისი დრო რჩებათ საშინაო დავალებების შესასრულებლად, რომ აღარაფერი ვთქვათ დასვენებაზე. რეპეტიტორობის ინსტიტუტის დამკვიდრება, რაც ერთადერთი გამოსავალია მშობლებისთვის, რომელთა შვილებიც საჯარო სკოლებში სწავლობენ, კიდევ უფრო აქვეითებს მასწავლებლების მოტივაციას ჩაატარონ ხარისხიანი გაკვეთილები.

7. სკოლში სიარულის რეალური მიზეზი. გულისტკივილით უნდა აღვნიშნო, რომ ჩვენი ბავშვები კარგავენ სწავლისადმი ლტოლვას და იმედგაცრუებულნი ხდებიან განათლების სისტემით. მათთვის სკოლაში სიარულის ერთადერთი მიზეზი ნიშნების მიღება და სკოლის დამამთავრებელი ატესტატის აღებაა, რაც აუცილებელ პირობას წარმოადგენს სწავლის გასაგრძელებლად უმაღლეს საგანმანათლებლო დაწესებულებაში.

ბავშვთა უფლებათა კოდექსის მე-10 მუხლის თანახმად, ყველა ბავშვს აქვს ხარისხიანი და ინკლუზიური განათლების მიღებისა და თანაბარი ხელმისაწვდომობის უფლება, თუმცა დღეს ეს უფლება დარღვეულია.

დაჟინებით მოგიწოდებთ, მიანიჭოთ პრიორიტეტი ჩვენი მოსწავლეების კეთილდღეობასა და აკადემიურ წარმატებას და მიიღოთ დაუყოვნებელი და გადამწყვეტი ზომები უფრო სამართლიანი და ინკლუზიური განათლების სისტემის შესაქმნელად, რომელიც საშუალებას მისცემს თითოეულ ბავშვს სრულად გამოიყენოს თავისი პოტენციალი. ჩვენს შვილებს არ შეუძლიათ მეტი ლოდინი მნიშვნელოვანი ცვლილებებისთვის.

მოუთმენლად ველი თქვენს სწრაფ მოქმედებას და მნიშვნელოვან ძალისხმევას ჩვენი ქვეყნის საშუალო სკოლებში განათლების ხარისხის გასაუმჯობესებლად. საჭიროების შემთხვევაში, მზად ვარ მივიღო სამართლებრივი ზომებიც და არ დავაკლებ მცდელობას, რათა ხარისხიანი განათლება ხელმისაწვდომი გახდეს საქართველოს ყველა მოსწავლისთვის“, – წერს მარიამ საკანდელიძე.

როგორც დღეს მე-12, მე-11, მე-9, მე-8 და მე-6 კლასოს მოსწავლეების მშობელმა EDU.ARIS.GE-ს განუცხადა, მოლოდინი აქვს, რომ განათლების სამინისტრო მოახდენს რეაგირებას და განახორციელებს საჭირო რეფორმებს, თუმცა, წერილი მხოლოდ დასაწყისია: „დაგეგმილი მაქვს სხვა ნაბიჯების გადადგმა და გვერდით მიდგას ორგანიზაცია „მშობლები განათლებისთვის“. საჭიროების შემთხვევაში, მზად ვარ მივიღო სამართლებრივი ზომები“.

ასევე იხილეთ:

რა გამოწვევებია დღეს სკოლებში სანიტარულ-ჰიგიენური ნორმების დაცვის მხრივ – უახლესი მოკვლევა და რეკომენდაციები მთავრობას