რა ხდება საგამოცდო ცენტრში შესვლის შემდეგ – გზამკვლევი 2019 წლის გამოცდებისთვის

2019 წლის ეროვნული გამოცდების დაწყებამდე სულ რამდენიმე დღე რჩება. 1 ივლისს გამოცდები აბიტურიენტთა ქართული ენისა და ლიტერატურის გამოცდით დაიწყება. გამოცდების ეროვნული ცენტრი აბიტურიენტებს, მაგისტრობის მსურველებს, სტუდენტთა საგრანტო კონკურსის მონაწილეებს, მასწავლებლებსა და მასწავლებლობის მსურველებს საგამოცდო ცენტრში შესვლის შემდეგ არსებულ ვითარებასა და პროცედურებზე, მითითებებს აძლევს:

აპლიკანტები ადგილზე საგამოცდო ბარათზე მითითებულ დროსა და ადგილზე უნდა გამოცხადდნენ;

რეგისტრაციის გავლამდე აბარებთ ზედმეტ ნივთებს. რეგისტრაციის გავლის შემდეგ კი იკავებთ თქვენთვის განკუთვნილ ადგილს შესაბამის სექტორში;

სექტორში დაგირიგდებათ პასუხების ფურცელი და ფურცელი შავი სამუშაოსათვის, ასევე გამოცდით გათვალისწინებული დამხმარე მასალა (მაგ.: კალამი, რუკა, მენდელეევის ტაბულა);

ანონიმურობის უზრუნველსაყოფად პასუხების ფურცელზე დაიკვრება ინდივიდუალური შტრიხკოდი;

განსაკუთრებული ყურადღება მიაქციეთ პასუხების ფურცლის დაუზიანებლობას. არ შეიძლება მისი დაკეცვა ან დაჭმუჭვნა, რაიმე ჩანაწერის გაკეთება (რომელიც არ ეხება ტესტის კითხვების პასუხს);

ყველა საგამოცდო სექტორში დამონტაჟებულია ვიდეოკამერა – მთელი საგამოცდო პროცესი იწერება;

საგამოცდო დროის ამოწურვის, ან თქვენ მიერ სამუშაოს ადრე დასრულების შემთხვევაში, დამკვირვებელი ამოწმებს პასუხების ფურცლისა და შტრიხკოდის დაუზიანებლობას, რასაც ადასტურებთ უწყისში ხელმოწერით. ამის შემდეგ დამკვირვებელს აბარებთ ნამუშევარს, რითაც საგამოცდო პროცესი სრულდება;

პასუხების ფურცლები ილუქება და იგზავნება შეფასებისა და გამოცდების ეროვნულ ცენტრში.

ამავე თემაზე:

საგამოცდო ბარათის მიღებისა და გამოყენების წესი – რომელ საათზე მივდივართ საგამოცდო ცენტრში

2019 წლის საგამოცდო ცენტრების ჩამონათვალი და მარშრუტები

2019 წლის ერთიანი ეროვნული გამოცდების ჩატარების განრიგი

განახლებადი ინფორმაცია გამოცდების შესახებ