SANGU-ს ევროკავშირის ელჩი საქართველოში, პაველ ჰერჩინსკი ეწვია

5 ოქტომბერს, მასწავლებლის საერთაშორისო დღეს, საქართველოს საპატრიარქოს წმ. ანდრია პირველწოდებულის სახელობის ქართულ უნივერსიტეტს ევროკავშირის ელჩი საქართველოში, პაველ ჰერჩინსკი ეწვია.

უნივერსიტეტის მიერ 6 ოქტომბერს გამოქვეყნებული ინფორმაციით, ვიზიტის ფარგლებში ელჩი შეხვდა უნივერსიტეტის რექტორს, ირაკლი ბრაჭულს, დაათვალიერა უნივერსიტეტი და გაესაუბრა პროფესორებსა და სტუდენტებს, რომლებმაც Erasmus+-ის ფარგლებში ევროპაში ისწავლეს.

ელჩი ასევე შეხვდა მარია მენშიკოვას, Universitas Mercatorum-ის (იტალია) პროფესორს, რომელიც SANGU-ში Erasmus Mobility-ის ფარგლებში იმყოფება. მისი ვიზიტი მოიცავს შეხვედრებსა და ვორკშოპებს ხელოვნური ინტელექტის, ციფრული ტრანსფორმაციის, ჰიბრიდული სწავლების, უნივერსიტეტის ადმინისტრირების, სწავლებისა და კვლევის თანამედროვე მიდგომების შესახებ.

ღონისძიების ფარგლებში პაველ ჰერჩინსკიმ მასწავლებლის მომზადების 60-კრედიტიანი პროგრამის კურსდამთავრებულებს დიპლომები გადასცა.

ელჩმა მასწავლებლებს პროფესიული დღე მიულოცა და აღნიშნა, რომ SANGU აჩვენებს, რომ შესაძლებელია ტრადიციული ღირებულებების, თანამედროვე განათლებისა და საერთაშორისო კავშირების წარმატებით შეთავსება.

უნივერსიტეტის სხვა ამბები