„საქართველოში, ბავშვი, რომელიც სკოლაში 12 წელს ატარებს, შედეგებით მე-8, მე-9 კლასელის დონეზეა“

სამხრეთ კავკასიაში მსოფლიო ბანკის რეგიონული დირექტორი სებასტიან მოლინეუსი აცხადებს, რომ საქართველოში განათლების სისტემის ერთ-ერთი პრობლემა სწავლის ხარისხია და ბავშვი რომელიც სკოლაში 12 წელს ატარებს, შედეგებით მე-8, მე-9 კლასელის დონეზეა. ამის შესახებ მან განათლების ხარისხის ამაღლების კუთხით, მსოფლიო ბანკის ახალი პროექტის პრეზენტაციის დაწყებამდე ჟურნალისტებთან ისაუბრა.

პროექტი „ინოვაცია, ინკლუზიური განათლება და ხარისხი“ 102,7 მილიონის დოლარის ღირებულებისაა და მიზნად ისახავს საქართველოში ადამიანური კაპიტალის განვითარებას სკოლამდელ განათლებაზე ხელმისაწვდომობის გაზრდის, ხარისხიანი განათლებისა და ხელსაყრელი სასწავლო გარემოს უზრუნველყოფის გზით.

„ძალიან მნიშვნელოვანი პროექტია, ეხება განათლებას და შედგება რამდენიმე კომპონენტისგან. მათ შორისაა განათლების და სწავლის ხარისხის გაუმჯობესება. ჩვენ ვიცით, რომ ბავშვები 12 წელს სწავლობენ სკოლაში, მაგრამ სინამდვილეში მათი შედეგი ისეთია, თითქოს 8 ან 9 წელი გაატარეს სკოლაში. ეს პროექტი არის ამის გაუმჯობესების დიდი საშუალება. მეორე საკითხია კადრებზე, მასწავლებელთა კვალიფიკაციაზე ფოკუსირება. ჩვენ ყველამ ვიცით ჩვენი გამოცდილებიდან სკოლებში, რომ რაც არ უნდა კარგი სისტემა გვქონდეს განათლებაში, თუ კადრები არ გვყავს შესაბამისი, განათლების ხარისხი ვერ იქნება სათანადო.

“ჩვენ მოხარულები ვართ, რომ საქართველოს მთავრობამ მიიღო გადაწყვეტილება განათლების დაფინანსების მნიშვნელოვანი ზრდის შესახებ და ის იქნება ქვეყნის მშპ-ის 6%. შემდეგი კომპონენტი არის ინფრასტრუქტურა. ჩვენ ვნახეთ სკოლები, განსაკუთრებით რეგიონებში, სადაც გათბობა ხდება შეშის ღუმელების მეშვეობით. სკოლის გარემო უნდა იყოს სწავლისთვის კარგი და კომფორტული, ამიტომ მესამე კომპონენტში ჩვენი მიზანია, ჯერ ერთი გათბობის საკითხის მოწესრიგება სკოლებში და ამ მხრივ ხელშეწყობა და მეორეს მხრივ, ინოვაციების, კომპიუტერების, ტაბლეტების შეტანა სკოლებში, რომ ბავშვებს ჰქონდეთ თანამედროვე საშუალებები, რაც სწავლის შედეგებს გააუმჯობესებს”, –  განაცხადა სებასტიან მოლინეუსმა.

განათლების, მეცნიერების, კულტურის და სპორტის სამინისტროში აცხადებენ, რომ მომდევნო ექვსი წლის განმავლობაში პროექტის ინფრასტრუქტურული კომპონენტი ხუთი ახალი სკოლის მშენებლობას, დაახლოებით 60 არსებული სკოლის რეაბილიტაციას უზრუნველყოფს. პროექტი ასევე გულისხმობს სკოლისთვის მოსამზადებლად, ბავშვზე ფოკუსირებული და თანამედროვე სკოლამდელი განათლების 150-ზე მეტი პროგრამის დანერგვას. მთლიანობაში, პროექტი სკოლამდელი ასაკისა და ზოგადსაგანმანათლებლო სკოლის დაახლოებით 116, 000 მოსწავლეს შეეხება.

„მსოფლიო ბანკის საგანმანათლებლო პროექტი საქართველოს 116 ათასზე მეტ მოსწავლეს მოიცავს„

მოამზადა თამთა ვირსალაძემ