საქართველოში დიპლომატიის უმაღლესი საგანმანათლებლო დაწესებულება იქმნება – მთავრობის გადაწყვეტილება

მთავრობის გადაწყვეტილებით, იქმნება უმაღლესი საგანმანათლებლო დაწესებულება – საქართველოს დიპლომატიის აკადემია.

ამის შესახებ საქართველოს პრემიერ-მინისტრმა, ირაკლი კობახიძემ დღეს, 8 მაისს, მთავრობის სხდომის დაწყებამდე განაცხადა.

მისი თქმით, სამწუხაროდ, სახელმწიფო და კერძო უნივერსიტეტების შესაბამისი ფაკულტეტები დღეს არსებითად ვერ უზრუნველყოფენ მომავალი დიპლომატებისთვის აუცილებელი ცოდნისა და უნარების სათანადოდ გადაცემას.

აკადემიას ავტორიზაციის გავლის ვალდებულება ექნება და ამის შემდეგ, მომავალი წლის სექტემბრიდან დაიწყებს საქმიანობას.

„საქართველოს დიპლომატიის აკადემია მოამზადებს მაღალკვალიფიციურ კადრებს დიპლომატიური სამსახურისთვის. უწყებრივი დაქვემდებარება ხელს შეუწყობს აკადემიას სწავლებისა და კვლევის მაღალი ხარისხის უზრუნველყოფაში. თქვენ იცით, რომ წარმატებით ფუნქციონირებს რამდენიმე უმაღლესი საგანმანათლებლო დაწესებულება ასეთი უწყებრივი დაქვემდებარებით. ეს არის მაგალითად, საქართველოს თავდაცვის აკადემია, ასევე შინაგან საქმეთა სამინისტროს აკადემია, ასევე შეიქმნა, მოგეხსენებათ, უსაფრთხოების აკადემია. ამ წარმატებული პრაქტიკის გათვალისწინებით, ვფიქრობთ, რომ საქართველოს დიპლომატიის აკადემიაც თავისი უწყებრივი დაქვემდებარებით წარმატებით უზრუნველყოფს თავისი მნიშვნელოვანი ფუნქციის შესრულებას. მომავალი წლის სექტემბრიდან, ავტორიზაციის გავლის შემდეგ, დიპლომატიის აკადემია წარმატებით დაიწყებს ფუნქციონირებას. ჩვენი ამოცანაა, რომ მოვამზადოთ მაღალკვალიფიციური კადრები ჩვენი დიპლომატიური სამსახურისთვის, რაც მნიშვნელოვანია ჩვენი ქვეყნის საგარეო პოლიტიკური პოზიციების შემდგომი გამყარებისთვის“, – განაცხადა ირაკლი კობახიძემ.

აკადემიის კონცეფცია საქართველოს საგარეო საქმეთა სამინისტრომ მოამზადა.