სახელმწიფოს მიერ სრულად დაფინანსებულ საგანმანათლებლო პროგრამებს 5 პროგრამა დაემატა

სახელმწიფოს მიერ სრულად დაფინანსებულ საგანმანათლებლო პროგრამებს ე.წ. უფასო ფაკულტეტებს 2017-2018 სასწავლო წლისთვის 5 პროგრამა დაემატა.

როგორც EDU.ARIS.GE-ის განათლების სამინისტროს, უმაღლესი განათლებისა და მეცნიერების განვითარების დეპარტამენტის უფროსის მოადგილე, ვალერიან გობრონიძემ განუცხადა, მიმდინარე წელსაც გასული წლის მსგავსად 7 მიმართულება დაფინასდება სახელმწიფოსგან სრულად, თუმცა მასში 2016 -2017 სასწავლო წლისგან განსხვავებით იქნება 21-ის ნაცვლად 26 საგანმანათლებლო პროგრამა.

გობრონიძის თქმით, წელს საგანმანათლებლო პროგრამები საქართველოს ტექნიკურმა უნივერსიტეტმა დაამატა. ესენია:

1. მექანიკის ინჟინერია და ტექნოლოგია;
2. სამრეწველო ინჟინერია და ტექნოლოგია;
3. სამთო და გეო ინჟინერია;
4. მეტალურგია;
5. მასალათმცოდნეობა.

„გასულ წელს იყო 7 მიმართულება და 21 სპეციალობა, რომელსაც ამტკიცებდა მთავრობა. წელს ეს წესი შეიცვალა და მთავრობამ დაამტკიცა 7  მიმართულება, საგანმანათლებლო პროგრამები კი უნივერსიტეტმა თავად განსაზღვრეს სამინისტროსთან შეთანხმებით“, – განაცხადა გობრონიძემ.

რაც შეეხება ადგილებს, წელს სახელმწიფოსგან სრულად 2 250 ლარის ოდენობით დაფინანსდება 5 655 სტუდენტი.

2017 წლის სახელმწიფოს მიერ სრულად დაფინანსებული ფაკულტეტების სია და ადგილები გამოქვეყნდა

მოამზადა ქეთი გიგოლაშვილმა