თსუ-ში ფინალური გამოცდების ფორმატი არ შეიცვლება – რა შედეგებით დასრულდა სტუდენტებისა და რექტორის შეხვედრა

თსუ-ის რექტორი, ადმინისტრაცია და პროფესურა 17 ივნისს პროტესტის მონაწილე სტუდენტებს შეხვდა. უნივერსიტეტში საპროტესტო ტალღა ფინალური გამოცდების ონლაინ რეჟიმში ჩატარების მოთხოვნამ ააგორა, რასაც სხვა მოთხოვნებიც მალევე დაემატა.

„გაერთიანებულ შეხვედრაზე დიალოგის ფორმატში იმსჯელეს 4 ძირითად საკითხზე, რომელიც სტუდენტთა აღნიშნულმა ჯგუფმა ჩამოაყალიბა. ესაა საერთო საცხოვრებლების თემა, უნივერსიტეტის ფინანსური გამჭვირვალობა, რექტორის არჩევის წესი და ფინალური გამოცდების ფორმატი“, – ვკითხულობთ თსუ-ს მიერ EDU.ARIS.GE-სთვის გამოგზავნილ ინფორმაციაში.

რა გადაწყვეტილებები მიიღეს თსუ-ში სტუდენტებისა და რექტორატის შეხვედრისას აღნიშნულ 4 საკითხზე:

ფინალური გამოცდები

რექტორატი ფინალურ გამოცდებთან დაკავშირებით დათმობაზე არ მიდის. როგორც სტუდენტებთან შეხვედრის დროს, რექტორმა, გიორგი შარვაშიძემ სტუდენტებთან საუბარში განაცხადა, ფინალური გამოცდების ფორმატი არ შეიცვლება, გამოცდები დაიწყება 20 ივნისიდან 3 საგამოცდო ცენტრში, თბილისში, ქუთაისსა და ახალციხეში გაიმართება.

იმ შემთხვევაში, თუ სტუდენტი ობიექტური გარემოებების გამო ვერ ახერხებს საგამოცდო პროცესში მონაწილეობას, მას მიეცემა საშუალება მიმართოს თავისი ფაკულტეტის ადმინისტრაციას, სადაც ყველა მიმართვა ინდივიდუალურად განიხილება და, შესაბამისი დასაბუთების შემთხვევაში, ფაკულტეტი სტუდენტებს შესთავაზებს გამოცდის გადატანას სექტემბერში და სტუდენტთა გარკვეულ ნაწილთან დაკავშირებული სირთულეებიც მოიხსნება.

საერთო საცოვრებელი

ერთ-ერთი მთავარი საკითხი, რაც სტუდენტებს აწუხებთ, საერთო საცხოვრებლების თემაა. სტუდენტები მოითხოვენ, მოწესრიგდეს არსებული სტუდენტური საცხოვრებელი და აშენდეს ახალი, რომელიც დააკამყოფილებს სტუდენტთა მოთხოვნებს. როგორც თსუ-ს მიერ ჩვენთვის გამოგზავნი ინფორმაციაში ვკითხულობთ, რექტორი, გიორგი შარვაშიძე სტუდენტებს დაპირდა, რომ არსებული სოციალურ-ეკონომიკური პრობლემები სასწავლებლის ადმინისტრაციას კარგად ესმის და საკუთარი შესაძლებლობების ფარგლებში აქტიურად აგრძელებენ სტუდენტთათვის საერთო საცხოვრებლების უზრუნველყოფაზე მუშაობას. რაც შეეხება ბაგებში არსებულ საერთო საცხოვრებელს, რექტორის განცხადებით, დასკვნის თანახმად, შენობის სრული განახლება არ არის რეკომენდებული და მოითხოვს მნიშვნელოვან ფინანსურ რესურსს. შესაბამისად, უნივერსიტეტის ადმინისტრაციამ მიიღო გადაწყვეტილება, რომ ეს რესურსები ახალი საცხოვრებლის მშენებლობაზე მიმართოს, რომელიც ეტაპობრივად ჩაანაცვლებს ბაგების საერთო საცხოვრებელს.

უნივერსიტეტის ბიუჯეტი

ფინანსური გამჭვირვალობის საკითხი იყო კიდევ ერთი თემა, რომელზეც სტუდენტებთან შეხვედრისას რექტორატმა იმსჯელა. ამ საკითხით დაინტერესებულ სტუდენტებს ადმინისტრაციის ხელმძღვანელმა, ლაშა საღინაძემ განუმარტა, რომ თსუ საჯარო სამართლის იურიდიული პირია, მისი ბიუჯეტის ამსახველი ინფორმაცია ეტაპობრივად ქვეყნდება უმაღლესი სასწავლებლის ვებგვერდზე და საჯარო/ხელმისაწვდომია საიტის ნებისმიერი მომხმარებლისთვის. ასევე, დაინტერესებულ სტუდენტს შეუძლია, ელექტრონული ფორმით მოითხოვოს მისთვის საინტერესო ფინანსური ინფორმაცია და კანონით დადგენილ ვადებში მიიღოს ეს ინფორმაცია უნივერსიტეტის შესაბამისი სამსახურისგან.

რექტორის არჩევის წესი

შეიცვალოს რექტორის არჩევის წესი, გახდეს დემოკრატიული და ყოველი ლექტორისათვის ხელშესახები – ეს კიდევ ერთი მოთხოვნაა, რომელსაც სტუდენტები აყენებენ.

თსუ-ს მიერ გავრცელებულ ინფორმაციაში ვკითულობთ, რომ უნივერსიტეტის ადმინისტრაცია მზადაა შექმნას პლატფორმა, რომლის მუშაობაში ჩართვა შეეძლება ნებისმიერ სტუდენტს თუ აკადემიური/ადმინისტრაციული პერსონალის წარმომადგენელს, რათა ერთობლივად, სამუშაო ფორმატში იმსჯელონ რექტორის არჩევის ახლანდელ პრაქტიკასა თუ არჩევის წესთან დაკავშირებულ ინიციატივებზე. პირველი სამუშაო შეხვედრა შედგება 24 ივნისს, 19:00 საათზე, თსუ პირველ კორპუსში. ამ შეთანხმებასთან ერთად, რექტორმა ისიც თქვა, რომ რექტორის
არჩევის წესი, პროცედურები თუ კრიტერიუმები რეგულირდება კანონით უმაღლესი განათლების შესახებ და შესაბამისად, ცვლილების შესახებ გადაწყვეტილება პარლამენტმა უნდა მიიღოს’’.

ასევე იხილეთ:

ახალი შეთავაზება სტუდენტებს – თსუ-ის ადმინისტრაცია განცხადებას ავრცელებს

„ვთხოვ უნივერსიტეტის ხელმძღვანელობას და განათლების სამინისტროს, სერიოზულად მოეკიდონ საკითხებს“ – თსუ-ში პროტესტის მონაწილეებს სახალხო დამცველი შეხვდა