რომელია სწორი – აჯილდოებს თუ აჯილდოვებს? უდავო თუ უდაო? მომჟაო თუ მომჟავო?
გრამატიკულ ცნობარში დღეს ვ ბგერის ჩართვის და დაკარგვის ყველაზე გავრცელებულ შემთხვევებს მიმოვიხილავთ:
სიტყვაში ვ ბგერის ჩართვის ან ამოღების წესების დასადგენად ამჟამად ერთი თანმიმდევრული პრინციპი, წესი არ არსებობს. ხშირია მისი დაკარგვის შემთხვევები იქ, სადაც მისი არსებობა, ერთი შეხედვით, კანონიერია ( მაგალითად, ვ ფუძის ნაწილია) და ასევე ხშირია მისი მოულოდნელად გაჩენა ( ჩართვა) ფუძის და ახალდართული დაბოლოების საზღვარზე.
ვ ბგერის ჩართვა
ვ ფუძესა და დაბოლოებას შორის ჩნდება მაშინ, თუ ფუძეს ამთავრებს ხმოვნები ა, ე, ო და მოსდევს ა და ე ხმოვნები. ეს, ხშირ შემთხვევაში, ხდება მე-ე, სა-ე და სი-ე თავსართ-ბოლოსართების დართვის დროს. მაგალითად, ავიღოთ ო-ზე დაბოლოებული სიტყვა:
ახლო
დავუმატოთ თავსართი სი და ბოლოსართი ე:
სიახლოვე
წესის თანახმად, ვ-ს ჩართვა ამ შემთხვევაში სავალდებულოა!
საგანგებოდ უნდა გამოიყოს ო ხმოვნით დაბოლოებული სახელებიდან წარმოქმნილი სიტყვების მართლწერა:
ო ხმოვნით დაბოლოებული სახელებიდან წარმოქმნილი სიტყვები ვ-ს გაიჩენენ მაშინ, თუ ისინი დასრულებულ მოქმედებას გამოხატავენ ( მეორე სერია, წყვეტილი, დაესმის კითხვა რა ვქენი/რა ქენი/რა ქნა…).
ჯილდო – დააჯილდოვა (რა ქნა?)
მაგრამ
აჯილდოებს ( ვ-ს გარეშე!)
უთო – დააუთოვა
მაგრამ
აუთოებს
ვ ასევე ჩნდება ნასახელარ ზმნებში:
ხე – ახევებს
ქვა – აქვავებს
ვ ბგერის დაკარგვა:
ფუძისეული ვ იკარგება მაშინ, როცა ის ექცევა ხმოვნებს შორის და მომდევნო ხმოვანი არის ო ან უ.
თავი – თაობა; ხევი – ხეობა; ბუნებრივი – ბუნებრიობა;
ნათესავი – ნათესაობა; სანახავი – სანახაობა; საცოდავი – საცოდაობა…
(გამონაკლისებად მიჩნეულია ერისთავი – ერისთავობა და მოურავი – მოურავობა; აგრეთვე უცხო წარმოშობის სიტყვები: აქტივობა, უპერსპექტივობა);
ვ იკარგება – ურ და – ოდ დაბოლოებების დართვისას მათი მეშვეობით წარმოებულ სიტყვებში:
თავი – მეთაური, ფშავი – ფშაური, აქტივი – აქტიური, ყვავის-ყვაოდა, ჩივის – ჩიოდა, ირხევა-ირხეოდა.
იგივე შეეხება თავსართ-ბოლოსართების დართვის შემთხვევებს: საფლავი – სასაფლაო, რეცხვა/მრეცხავი-სამრეცხაო, ნიძლავი – სანაძლეო.
გამონაკლისია შემდეგი სიტყვები:
უთავო, უდავო, სადავო, საზავო, მოშავო, მომჟავო და ა.შ.
აქ წარმოდგენილია ყველაზე ხშირი შემთხვევები. ვ-ს შენარჩუნების, დაკარგვისა და ჩართვის ყველა შემთხვევის აღნუსხვა ორთოგრაფიული ლექსიკონის პრეროგატივაა და წესით, სრულად იქ უნდა იყოს აღნუსხული.
გრამატიკული ცნობარის სხვა გაკვეთილები
რუბრიკის ავტორი: ნინო ლომიძე, ფილოლოგი
- რა უფლებები მიენიჭათ საგანმანათლებლო რესურსცენტრებს სკოლებთან მიმართებით აჭარაში – განათლების მინისტრის ბრძანება by ARIS.GE-განათლება
- როგორ უნდა იმუშაოს აბიტურიენტმა პასუხების ფურცელზე – NAEC-ის რჩევები უცხოური ენის გამოცდისთვის by რჩევები
- დაიწყება თუ არა სკოლაში ქართული ენის ცალკე საგნად სწავლება? – რა პასუხი აქვს განათლების მინისტრს by ARIS.GE-განათლება