CIU-ს სტუდენტური სტარტაპი GITA-ს საუნივერსიტეტო კონკურსის გამარჯვებულია

საქართველოს ინოვაციებისა და ტექნოლოგიების სააგენტოს (GITA) მიერ ორგანიზებული საუნივერსიტეტო კონკურსის – UNI4VERSE – ფარგლებში, “ხალხის რჩეული” გუნდის ნომინაციაში გამარჯვებული კავკასიის საერთაშორისო უნივერსიტეტის სტუდენტური სტარტაპი “ჩაკო” გახდა. გუნდმა შეძლო დამსახურებული აღიარება მოეპოვებინა და GITA-ს ინკუბატორში აქსელერაციის პროგრამაში მონაწილეობის უნიკალური შესაძლებლობა მიიღო.

UNI4VERSE არის ერთ-ერთი ყველაზე მასშტაბური პროექტი, რომლის მიზანიც უნივერსიტეტებსა და სტუდენტებში ინოვაციებისა და ტექნოლოგიების მიმართ ინტერესის გაღვივება და ჩართულობის გაზრდაა.

2024 წლის კონკურსის მთავარი თემატიკა მწვანე ეკონომიკა და ტექნოლოგიები იყო. პროექტი პირველად ჩატარდა და მან გამოავლინა ის უნივერსიტეტები და სტუდენტები, რომლებიც ინოვაციური იდეებით გამოირჩევიან.

კონკურსში მონაწილეობა მთელი საქართველოს მასშტაბით 18 უნივერსიტეტმა მიიღო. მათგან სამი საპრიზო ადგილი გამოვლინდა, ხოლო “ჩაკო” ხალხის რჩეული უნივერსიტეტის ნომინაციაში გამარჯვებული გახდა. ამ აღიარებამ კიდევ ერთხელ წარმოაჩინა სტუდენტური ინიციატივებისა და ტექნოლოგიური პროგრესის მნიშვნელობა.

“ჩაკო” უნიკალური, მზის ენერგიაზე მომუშავე ჭკვიანი ზურგჩანთაა, რომელიც არა მხოლოდ ნივთების ტარებისთვის არის განკუთვნილი, არამედ მომხმარებლის გაჯეტების ნებისმიერ დროს დამუხტვასაც უზრუნველყოფს – ეს ყველაფერი ეკო-მეგობრული ენერგიით!

„ჩაკო“ მიზნად ისახავს: მზის ენერგიის გამოყენებით კომფორტისა და ეკოლოგიური პასუხისმგებლობის გაერთიანებას; მომხმარებლებისთვის მდგრადი და ინოვაციური ტექნოლოგიური გადაწყვეტილების შეთავაზებას; მომავლის ეკო-მეგობრული პროდუქტის პოპულარიზაციას.

“ჩაკო” შექმნილია კავკასიის საერთაშორისო უნივერსიტეტის ბიზნესისა და ტექნოლოგიების ფაკულტეტის ბაზაზე არსებულ „ბიზნესინკუბატორში“. პროექტის მენტორია ია ნადირაშვილი.

უნივერსიტეტის სხვა ამბები