GRUNI-ს სტუდენტებისთვის ლექცია-სემინარი „მთის მდგრადი განვითარების სწავლება“ გაიმართა

გრიგოლ რობაქიძის სახელობის უნივერსიტეტის ბიზნესისა და მართვის სკოლის ტურიზმის პროგრამის სტუდენტებისთვის, საერთაშორისო პროექტის ფარგლებში, ალგეთის ეროვნული პარკის ტერიტორიაზე ლექცია-სემინარი „მთის მდგრადი განვითარების სწავლება“ გაიმართა.

GRUNI-ს მიერ 24 სექტემბერს გამოქვეყნებული ინფორმაციით, საერთაშორისო პროექტი კონკურენტული ინოვაციის ფონდის პროექტის – SUSMAUN (საგრანტო ხელშეკრულება CIF-2-2024-05), ფარგლებში დაიგეგმა.

პროექტი უზრუნველყოფდა: დაცულ ტერიტორიაზე საცხოვრებელს კარვებით, ტრანსპორტირებას, საფეხმავლო მარშრუტების გავლასა და სხვადასხვა აქტივობას. სწავლება ქართულ და ინგლისურ ენებზე ჩატარდა.

პროექტის ფარგლებში, ქართველმა და იტალიელმა პროფესორებმა – მაკა ფირანაშვილმა, მაია მელაძემ, სტეფანო კორსიმ, ანამარია ჯორჯიმ და რიკარდო გაჯეტიმ, სტუდენტებისთვის ტრენინგები ჩაატარეს. GRUNI-ს პროფესორებმა სტუდენტებთან მთიან რეგიონებში საფეხმავლო ტურის დაგეგმვის საკითხი განიხილეს.

საერთაშორისო სკოლა – პროექტში მონაწილეობდნენ მთის საკითხებით დაინტერესებული ქართველი და უცხოელი სტუდენტები, რომლებიც გაეცნენ: მთის მდგრადი განვითარების პრობლემებსა და სახელმწიფო პოლიტიკას; საერთაშორისო თანამშრომლობას მთის რეგიონებში; ბუნებრივ საფრთხეებსა და მისგან გამოწვეულ კატასტროფებს; STEM სწავლებას; საველე პირობებში დრონისა და გის ტექნოლოგიების საცდელ გამოყენებას, დაცული ტერიტორიების როლს მთის განვითარებაში და სხვა.

პროექტის პარტნიორები გრიგოლ რობაქიძის სახელობის უნივერსიტეტი, საქართველოს ტექნიკური უნივერსიტეტი და მილანის უნივერსიტეტი იყვნენ.

უნივერსიტეტის სხვა ამბები