„მე, ოჯახი, სახელმწიფო“ – გორის სახელმწიფო უნივერსიტეტში ახალგაზრდული პროექტის პრეზენტაცია გაიმართა

გორის სახელმწიფო უნივერსიტეტში ახალგაზრდული პროექტის „მე, ოჯახი, სახელმწიფო“ პრეზენტაცია გაიმართა.

პროექტის მიზანია ქართველი ახალგაზრდებისთვის სახელმწიფო პოლიტიკის ფარგლებში შემუშავებული ინიციატივების გაცნობა, მათში ჩართულობისა და აქტიური მონაწილეობის ხელშეწყობა, ასევე ეროვნული ტრადიციებისა და თანამედროვეობის შერწყმის გზით ახალგაზრდების საკუთარი ხედვებისა და იდეების წარმოჩენა. პროექტი ხორციელდება კონკურსის ფორმატით და დასრულდება 2026 წლის 20 თებერვალს.

პროექტი „მე, ოჯახი, სახელმწიფო“ ხორციელდება ახალგაზრდობის სააგენტოს საგრანტო კონკურსის „ახალგაზრდული ორგანიზაციების გაძლიერება“ ფარგლებში და ქალაქ თბილისის მერიის თანადაფინანსებით. პროექტის განმახორციელებელია დემოგრაფიული აღორძინების ფონდი.

პროექტი 19 დეკემბერს უნივერსიტეტში ავტორმა, ქალბატონმა თამარ ჩიბურდანიძემ წარადგინა.

შეხვედრა გახსნა გორის სახელმწიფო უნივერსიტეტის რექტორმა, პროფესორმა ალექსანდრე მღებრიშვილმა, რომელმაც ხაზი გაუსვა მსგავსი ინიციატივების მნიშვნელობას ახალგაზრდების სამოქალაქო აქტივობისა და ღირებულებითი ცნობიერების გაძლიერების პროცესში.

სტუდენტებს სიტყვით მიმართა და პროექტის ავტორს მადლობა გადაუხადა საქართველოს პარლამენტის წევრმა, აკადემიკოსმა გიორგი სოსიაშვილმა.

მისასალმებელი სიტყვით ასევე გამოვიდა უნივერსიტეტის რექტორის მოადგილე, ბატონი ზურაბ ზურაბაშვილი.