როგორი ხელფასებია NAEC-სა და EMIS-ში 2026 წელს – ხელმძღვანელები და მათი მოადგილეები

საქართველოს მთავრობის ორი სხვადასხვა განკარგულებით, განათლების, მეცნიერებისა და ახალგაზრდობის სამინისტროში შემავალი სსიპ-ების – შეფასებისა და გამოცდების ეროვნული ცენტრისა (NAEC) და განათლების მართვის საინფორმაციო სისტემის (EMIS) 2026 წლის ბიუჯეტი, საშტატო ნუსხა და სახელფასო ფონდი განისაზღვრა.

6 თებერვლით დათარიღებული განკარგულებები, რომლებსაც ხელს აწერს პრემიერ-მინისტრი ირაკლი კობახიძე, 1-ელი იანვრიდან წარმოშობილ სამართლებრივ ურთიერთობებზე ვრცელდება.

NAEC

დოკუმენტის თანახმად, შეფასებისა და გამოცდების ეროვნული ცენტრის დირექტორი, ხელფასის სახით, თვეში 9 600, ხოლო მისი მოადგილე (3 მოადგილე) 8 500 ლარს მიიღებს.

დეპარტამენტის უფროსის (7 უფროსი) ანაზღაურება 8 000, მისი მოადგილის კი (12 მოადგილე) 7 200 ლარი იქნება.

მთავრობის განკარგულება, რომლითაც ასევე განსაზღვრულია სამსახურის უფროსის, პირველი და მეორე კატეგორიის უფროსი სპეციალისტების თანამდებობრივი სარგოები, ჯამში, 100 პირს ეხება. მათი ხელფასისთვის კი წლიურად 7 000 000 ლარია გათვალისწინებული.

იხილეთ განკარგულება

EMIS

ახალი განკარგულების მიხედვით, განათლების მართვის საინფორმაციო სისტემის უფროსის ანაზღაურება 9 600 ლარი გახდა. რაც შეეხება მის ორ მოადგილეს, ისინი, ხელფასის სახით, თვეში 8 700 და 8 500 ლარს მიიღებენ.

დოკუმენტი EMIS-ში დასაქმებულ 29 პირს, მათ შორის სამსახურის უფროსებს, მათ მოადგილეებს, მთავარ ბუღალტერსა და მთავარ სპეციალისტებს ეხებათ. მათი თანამდებობრივი სარგოსთვის წლიურად განსაზღვრული თანხა კი 1 995 000 ლარია.

იხილეთ განკარგულება

ასევე იხილეთ:

მინისტრი, მოადგილეები და მათი თანაშემწეები – როგორ ნაწილდება ხელფასები თანამდებობების მიხედვით განათლების სამინისტროში 2026 წელს

მოამზადა მარიამ იმერლიშვილმა