„სადაც“ და „რომელშიც“ – აბიტურიენტებო, ამ მიმართებითი ფორმების სწორად გამოყენება იცით?

ავტორი: სალომე უსტარაშვილი, ქართული ენისა და ლიტერატურის მასწავლებლი, რეპეტიტორი

„სადაც“ და „რომელშიც“ ორივე მიმართებითი ფორმაა (ზმნიზედა და ნაცვალსახელი) და ქართულ მეტყველებაში ხშირად ერთმანეთს ენაცვლება, თუმცა მათ შორის არის მცირე შინაარსობრივი და გრამატიკული განსხვავება:

1. სადაც (მიუთითებს ზოგად ადგილზე)

ეს სიტყვა მომდინარეობს კითხვითი ნაცვალსახელისგან „სად?“. მას ვიყენებთ მაშინ, როდესაც ხაზს ვუსვამთ ადგილმდებარეობას ან სივრცეს, სადაც რაღაც ხდება.

ვიყენებთ,როცა წინადადებაში ნახსენებია ადგილი (ქალაქი, ქვეყანა, ქუჩა, სახლი).
მაგალითი: „ეს ის ქალაქია, სადაც ბავშვობა გავატარე“.

2. რომელშიც (მიუთითებს კონკრეტულ საგანზე ან შინაარსზე).

ეს სიტყვა შედგება სამი ნაწილისგან: რომელი (ნაცვალსახელი) + ში (თანდებული) + ც (ნაწილაკი). ის უფრო კონკრეტულია და მიუთითებს საგანზე, რომლის შიგნითაც რაღაც მოთავსებულია ან ხდება.

ვიყენებთ, როცა ვსაუბრობთ ნივთებზე, წიგნებზე, ფილმებზე…
მაგალითი: „ეს ის წიგნია, რომელშიც ბევრი საინტერესო ამბავი წერია“.

როდის შეიძლება ორივე?
ხშირ შემთხვევაში, როცა საქმე ფიზიკურ შენობას ან ადგილს ეხება, ორივე ფორმა მისაღებია:
„სახლი, სადაც ვცხოვრობ“ (აქცენტი ადგილზეა).
„სახლი, რომელშიც ვცხოვრობ“ (აქცენტი სახლზეა, როგორც ნაგებობაზე).

მნიშვნელოვანი ნიუანსი:
აბსტრაქტულ ცნებებთან სიტყვის „სადაც“ გამოყენება არასწორია.

შეცდომა: „ეს ის სიტუაციაა, სადაც დავიბენი.“
სწორია: „ეს ის სიტუაციაა, რომელშიც დავიბენი.“ (რადგან სიტუაცია გეოგრაფიული ადგილი არ არის).

ასევე იხილეთ:

„ვიტყვი, რას უნდა მიაქციონ აბიტურიენტებმა ყურადღება არჩევანის გაკეთებისას“ – NAEC-ის დირექტორის მითითებები