სამსახურში აღდგენა და განაცდურის ანაზღაურება – პედაგოგმა სკოლას სასამართლო დავა მოუგო

ქუთაისის 36-ე საჯარო სკოლის სამსახურიდან გათავისუფლებულმა მენტორმა მასწავლებელმა, ნატალია თურქაძემ სკოლას სასამართლო დავა მოუგო, რომლის საფუძველზეც სკოლას დაევალა პედაგოგი სამსახურში აღადგინოს და განაცდური პერიოდი ფინანსურად აუნაზღაუროს.

ინფორმაციას ამის შესახებ EDU.ARIS.GE-ს უდასტურებს თავად მასწავლებელიც:

„დაკმაყოფილდა სარჩელი, გადაწყვეტილებაა – აღდგენა და განაცდურის ანაზღაურება“, – გვითხრა დღეს, 20 მაისს ნატალია თურქაძემ.

პედაგოგის გათავისუფლების მიზეზი ყოფილი სადამრიგებლო კლასისგან მიღებული საჩუქარი გახდა, რომელიც ნატალია თურქაძეს კლასის ბანკეტზე გადასცეს. თავად ნატალია თურქაძეც ამბობდა, რომ გასულ წელს, ივნისის თვეში, მისი სადამრიგებლო კლასის კურსდამთავრებულებმა გამოსაშვებ ღონისძიებაზე მას საჩუქრად იტალიაში მოგზაურობა გადასცეს. სწორედ ასეთი საჩუქრის მიღება მიიჩნიეს არაეთიკურად ქუთაისის საგანმანათლებლო რესურსცენტრმა და სკოლის დირექტორმა, რომელმაც პედაგოგის გათავისუფლების გადაწყვეტილება მიიღო.

პედაგოგის საქმე ჯერ სკოლის დისციპლინურმა საბჭომ განიხილა, მაგრამ მასწავლებლის მხრიდან ეთიკური ნორმების დარღვევა არ დაუდგენია. სწორედ ამის შემდეგ მიიღო გადაწყვეტილება სკოლის დირექტორმა და ნატალია თურქაძე საკუთარი ბრძანებით გაათავისუფლა.

ამავე თემაზე:

არაეთიკური საქციელი? – მოსწავლეები, მშობლები და კოლეგები მენტორი მასწავლებლის სკოლაში დაბრუნებას ითხოვენ