თუ დეკრეტში ხართ და სკოლა ხელფასის დარიცხვას აგვიანებს – რა უნდა გაითვალისწინოთ

რა უნდა იცოდეს დეკრეტულ შვებულებაში მყოფმა მასწავლებელმა, როცა სკოლა ხელფასის დარიცხვას აგვიანებს? – ამის შესახებ 23 მაისს, საკუთარი უფლების შესახებ მასწავლებლებს ინფორმაცია მიაწოდა საქართველოს განათლების მუშაკთა გაერთიანებამ – Georgian Educational Laborers’ Union, სადაც თვლიან, რომ კანონების ცოდნა მასწავლებლებს იცავს სკოლაში წარმოქმნილი პრობლემური სიტუაციებისგან.

რა უნდა იცოდეთ:

ორსულობისა და მშობიარობის (დეკრეტულ) შვებულებაში ყოფნა მასწავლებლისთვის ყოველთვიური ხელფასის დაგვიანების მიზეზი ვერ გახდება.

აქ ხშირად ხდება ორი სხვადასხვა ანაზღაურების არევა:

1. სახელმწიფო დახმარება (2000 ლარი): ამ თანხას სოციალური მომსახურების სააგენტო გასცემს და ის მართლაც ერთიანად ირიცხება საბუთებისმოწესრიგების შემდეგ.
2. სკოლის მიერ დასამატებელი ხელფასი: საჯარო სკოლის მასწავლებლებს კანონით ეძლევათ სრული ხელფასი. სხვაობას (სახელმწიფო დახმარების მიღმა) სკოლა საკუთარი ბიუჯეტიდან ფარავს.

მთავარი დარღვევა: სკოლები ხშირად ელოდებიან დეკრეტის დასრულებას და პედაგოგს ამ სხვაობას თვეების შემდეგ, ერთიანად ურიცხავენ. ეს კანონის დარღვევაა!

საქართველოს შრომის ორგანული კოდექსის 41-ე მუხლის თანახმად, ხელფასი უნდა გაიცეს არანაკლებ თვეში ერთხელ. დეკრეტში ყოფნა ამ წესს არ აუქმებს. უფრო მეტიც, დაგვიანების ყოველი დღისთვის სკოლას ეკისრება პირგასამტეხლო – დაყოვნებული თანხის 0.07%.

თუ ხართ პედაგოგი და სკოლა გიგვიანებთ ყოველთვიურ ანაზღაურებას:

– მოითხოვეთ წერილობითი განმარტება დირექციისგან.

– უფლებების დარღვევის შემთხვევაში მიმართეთ შრომის ინსპექციის სამსახურს.

ასევე იხილეთ:

„სამსახურში აღდგენა და განაცდურის ანაზღაურება“ – პედაგოგმა სკოლას სასამართლო დავა მოუგო