უმაღლესი განათლების რეფორმასთან დაკავშირებით, ირაკლი კობახიძეს პარლამენტში ნოემბერში მოუსმენენ – შალვა პაპუაშვილის განცხადება

უმაღლესი განათლების რეფორმასთან დაკავშირებით პრემიერ-მინისტრს, ირაკლი კობახიძეს პარლამენტში ინტერპელაციის წესით მოუსმენენ. ამის შესახებ დღეს, 28 ოქტომბერს, პარლამენტის ბიუროს სხდომაზე შალვა პაპუაშვილმა განაცხადა.

საქართველოს პარლამენტის თავმჯდომარის თქმით, ინტერპელაციის კითხვები უკვე მზადაა და ის უმაღლესი განათლების რეფორმას შეეხება.

„შემოვიდა, ასევე, შემდეგი ინტერპელაციის კითხვები ფრაქცია „ქართული ოცნებისგან“ პრემიერ-მინისტრის მიმართ. როგორც იცით, ყოველი თვის ბოლო სასესიო კვირას არის შესაძლებლობა პრემიერ-მინისტრის ინტერპელაციისა და საჭირო არის ამისთვის, რომ პლენარული სხდომის კვირაზე ერთი კვირით ადრე იყოს კითხვები დასმული. ვინაიდან მიმდინარე კვირისთვის ეს ვადა გაშვებულია, მომავალ თვეში, 26-27 ნოემბერი უწევს ოთხშაბათი-ხუთშაბათი. 25 ნოემბრის კვირაში იქნება პრემიერ-მინისტრის მოსმენა ინტერპელაციის პროცედურით და ინტერპელაციის კითხვები ეხება განათლების რეფორმის საკითხებს, უმაღლესი განათლების რეფორმის კონცეფციას, რომელიც დაანონსებულია“, – განაცხადა შალვა პაპუაშვილმა.

ამავე თემაზე:

უმაღლესი განათლების სისტემის რეფორმის ეროვნული კონცეფცია – დოკუმენტი

პასუხი 11 კლასის ბოლონიის პროცესთან შეუთავსებლობაზე – „ჩვენ გვინდა, ქართველი ახალგაზრდები დარჩნენ საქართველოში“