მაია მიმინოშვილზე (ბლოგი)

მაია მიმინოშვილზე საუბარი ძველ მეგობრებთან ფეხბურთის ფინალის მოლოდინში ჩამოვარდა. საუბარში განათლების სფეროში მომუშავე 2 ადამიანი და აბიტურიენტების 2 მშობელი მონაწილეობდა, თამაშის დაწყების მაუწყებელმა მსაჯის სასტვენმა ძლივს გაგვაჩერა.

თემები, როგორც მახსოვს ისე დავალაგე, ვიფიქრე, რომ შეიძლება სხვებისათვისაც საინტერესო ყოფილიყო. ასე იწყებოდა:

– ვაიმე, ვაიმე! რა გააკეთა, სამაგისტრო გამოცდის B და C ნაწილის ჩატარებამდე სწორი პასუხები შემთხვევით გამოაქვეყნა!
– გაჩერდით, ასეც რომ იყოს, ამის გარკვევა შეუძლებელია და არ არის საჭირო, სხვა ვარიანტებით ჩაანაცვლებს.

ვის შეუძლია მაიაზე ობიექტურად საუბარი, ვინ შეაფასებს მის შრომას და შედეგებს?

– რეპეტიტორები, დარგის სპეციალისტები? ჯერ კიდევ გახსოვთ, ალბათ, რომ მაია რეპეტიტორების მტერია?
– არ ვიცი, არ ვიცი.
– მაიას გამსწორებლების დიდი ნაწილი, ზუსტად რეპეტიტორებია და, ალბათ, დუმილს ამჯობინებენ.
– აბა რა ქნას მაიამ…
– უკაცრავად, მე მხოლოდ იმის თქმა მინდოდა, რომ რეპეტიტორები შეფასებისგან, ალბათ, თავს შეიკავებენ.

– არასამთავრობო სექტორი და ექსპერტები? ყველანაირი კვლევების შედეგებს თუ ნახავთ – საქართველოს მოსახლეობას განათლების საკითხი ნაკლებად აინტერესებს.
– აუფ, რას ამბობ, ჩვენ ჩვენი შვილები ძალიან გვიყვარს.
– ვინ დავობს, ასეა, სოციალური დახმარების, დასაქმების, ჯანმრთელობისა და ქვეყანაში წესრიგის შემდეგ, შვილების განათლება არის.
– რა შუაშია ეხლა ეს არასამთავრობოებთან?
– რა ინტერესიც არის მოსახლეობის განათლების მიმართ ის არასამთავრობოები და განათლების სფეროში ექსპერტები გვყავს. გრანტიდან გრანტამდე ცხოვრობენ, გრანტის თემის იქით, გახედვის არც დრო და არც სურვილი აქვთ.
– ნაწილი ბევრ საკითხში ერკვევა
– ძალიან პატარა ნაწილი..

– მშობლები და ბავშვები?
– ახლა ელაპარაკე ამათ, ვინ მოუსმენს (იკითხე – რა ესმით?)

– საზოგადოების მტერი, ლევან ბერძენიშვილი, თუ უკბენს ან სამინისტროდან, პირადი აუტანლობის ფონზე ვინმე..
– თემაზე, მეგობარო, თემაზე.

– კეთილი, და რატომ უნდა ვუკბინოთ? ტერორიზმის განმარტება რომ არ იცის?
– იცის, იცის. აბა უცხოურ გრანტებს ვერ მიიღებდა.
– არ იყო ეს ტერმინი მნიშვნელოვანი, ესეების თემები ხომ, როგორც იქნა, კარგად იყო შერჩეული?
– ნამდვილად.
– თემურ ლენგი?
– გაჩუმდით.
– შარშანდელი და შარშანწინდელი ცოდვები?
– გვახსოვს.
– აბა ჯამბულოლაშვილებს რატომ არ უშვებს, ამას კითხულობთ? არ ესმის?
– დიახ, ვიცი რატომაც არ უშვებს, ეს მაიას ცნობილი ჯინსების თემის გაგრძელებაა. დისკომფორტის შემქმნელია გაშვება, არც მეტია და არც ნაკლები. რთულად ვხსნი?
– არც ისე.

– მაია მანიპულატორია?
– ნუ, რა სიტყვებს ხმარობ.
– მაპატიეთ, მაგრამ ეს ყველაზე მნიშვნელოვანი საკითხია.
– რას გულისხმობ?
– მომპარავს როგორ უნდა დაათვლევინო საწყობი?
– ფუ, რა შედარებებია.
– აბა, მაიას, როგორ შეუძლია წლიდან წლამდე, ბავშვების ცოდნის დონის შეფასება, თუ ტესტების ავტორი და შემდგენი თვითონ არის? ცხადია, რომ მარტივ ტესტებზე – უკეთესი შედეგებია, რთულზე – უარესი. მარტივი იყო შარშან? არ მახსოვს. წელს? არ ვიცი.
– იტყვის, რომ არაფერს არ აფასებს და ბავშბების დონე ვის აინტერესებს, საერთოდ?
– სოფლის ბოლოა.

– მაია – გმირია!
– რატომ?
– პრემიერმა, ერთ დღეში, ცენტრებში რომ კონდიციონერების ამბავი გადაწყვიტა, მაიას განა 1 თვით ადრე უთხრა.
– მოეშვი პრემიერს.
– არა! არ იყო ეს არც პრემიერის და არც მაიას საკეთებელი.
– აბა?
– განათლების მინისტრის საქმეა.
– მაშ, მელამ, ყბედმა და მდუმარემ ამდენი წელი რატომ ვერ გადაწყვიტეს?
– მთავარია, ახლა ხომ კმაყოფილია ყველა.
– ?
– სიგრილე, ცენტრები გარეუბნებშია გატანილი, მერიის სკამები – რამდენიც გინდა!! ჰა-ჰა, კრედოს ნაყინი და ალასანიას ყავა.
– სკოლები რას გავს?
– რა შუაშია ეს.
– 177-ე სკოლაში ინგლისურის გამოცდაზე ტექსტის მოსმენის დროს ტრაქტორი ამოქოქეს, იცი??
– მოინდომა ეხლა კორეა, მაინც გმირია.

– ფულზე, ფულზე, რატომ არ საუბრობ? ამდენს შოულობს!
– არ მინდა.
– რას ჰქვია?
– დაიმსახურა.
– მე?
– შენც, როგორც კი მაიასნაირ შედეგებს დადებ.
– BENAEC-ის და NAEC4SCHOOLS-ის პროექტების შედეგებზე, შემთხვევით, ხომ არ ლაპარაკობ?
– რასაკვირველია, არა, გამჭვირვალე გამოცდებზე და შეკრულ კოლექტივზე ვლაპარაკობ, უყვართ მაია.
– ბავშვებსაც უყვარს, იმის შემდეგ, რაც სასკოლო გამოცდებზე ქულები გააუქმა..
– არ გესმის, ეს ასეთი ტიპის გამოცდე….
– გესმოდეს კარგად შენ და მაიას.

– ახალი მინისტრი მაიას გაუშვებს ?
– სამოქალაქო განათლების ოლიმპიადები გახსოვს?
– ჯერ კიდევ ცოცხლობს მახსოვრობაში.
– მაიას დაანებოს თავი, მოადგილეებს მიხედოს, დიდებს და პატარებს
– რატომ, დადებითია მაია?
– არა, ადეკვატურია.
– თუ გამოიღვიძებს და ადამიანურ ტესტებს შესთავაზებს აბიტურიენტებს და კარგ იდეებს პალიტრას, მაშინ, დარჩეს მაია.
– ვიის? ჰო, ჰო, მაშინ დარჩეს, რასაკვირველია.
– მგონია, რომ უნდა წავიდეს, ძალიან ჯიუტია.
– კარგი რა, გაიხედე სამინისტროში რა ხდება, წარმატებები მაიას!

ავტორი: დავით ჯაფარიძე