„მოსწავლეების დაშინება საატესტატო გამოცდებით არ შეესაბამება პედაგოგიკის პრინციპებს“ – ახალგაზრდა პედაგოგის პოზიცია

საჯარო სკოლებში ორ საფეხურზე გამოცდების შემოტანას, მათ შორის საატესტატო გამოცდების დაბრუნების გეგმას, რომელზეც განათლების, მეცნიერებისა და ახალგაზრდობის მინისტრის მოადგილემ პარლამენტში 10 ივნისს ისაუბრა, ახალგაზრდა პედაგოგი ეხმიანება და კოლეგებს მიმართავს.

მინისტრის მოადგილის განცხადებით: „მიდის მუშაობა იმასთან დაკავშირებით, რომ ორ საფეხურზე – დაწყებითსა და საბაზოზე განმავითარებელი გამოცდები იქნება დადგენილი, ხოლო საატესტაციო გამოცდა, ანუ საშუალო განათლების ზოგადი გამოცდა, იქნება XII კლასში. ზოგად განათლებაში ეს ორი გამოცდა იქნება შემოღებული”. 

„ზოგად განათლებაში ორი გამოცდა იქნება შემოღებული“ – განათლების მინისტრის მოადგილე

თბილისის N70 საჯარო სკოლის ისტორიისა და სამოქალაქო განათლების უფროსი მასწავლებელი, შალვა მინდაძე მიიჩნევს, რომ თუ გამოცდები არ შემუშავდება სამართლიანად, საატესტატო გამოცდების სკოლაში დაბრუნება მოსწავლეების დაშინების ფორმად უნდა ჩავთვალოთ.

“გამოცდების შემოტანამ ნამდვილად შეიძლება გავლენა იქონიოს მოსწავლეთა სწავლისადმი დამოკიდებულებაზე. ამ გამოცდებმა, თუ სწორად არის სტრუქტურირებული და მართული, შეიძლება გააძლიეროს სწავლების ხარისხი და მოტივაცია, რაც, თავის მხრივ, გავლენას მოახდენს PISA-ს შედეგებზე. საატესტატო გამოცდებით, შესაძლოა, მოსწავლეები მეტი პასუხისმგებლობით მიუდგნენ სწავლას, რადგან ეს გამოცდები მათთვის მნიშვნელოვან მიზნად გადაიქცევა. ხოლო განმავითარებელი გამოცდები, რომლებიც ხშირად დიაგნოსტიკური ხასიათისაა, დაეხმარება მოსწავლეებს და მასწავლებლებს გაარკვიონ სუსტი მხარეები და საჭიროებები სწავლის პროცესში, რაც ხელს შეუწყობს ინდივიდუალური განვითარების გეგმის შექმნას.

“თუმცა, მნიშვნელოვანია აღინიშნოს, რომ ეს მოლოდინი რეალიზებული იქნება მხოლოდ მაშინ, თუ შეფასების სისტემა იქნება გამჭვირვალე, სამართლიანი და რეალურად ხელს შეუწყობს ცოდნის გაღრმავებას. ასევე, დიდი მნიშვნელობა აქვს მასწავლებლების გადამზადებას და მათი პროფესიული განვითარების პროგრამებს, რადგან მათ გარეშე ნებისმიერი გამოცდის შემოტანა შესაძლოა არამომგებიანი იყოს. შესაბამისად, სისტემა კომპლექსურად უნდა იყოს განახლებული და გაუმჯობესებული”, – განუცხადა EDU.ARIS.GE-ს ორი საგნის მასწავლებელმა.

კოლეგა მასწავლებლების საყურადღებოდ კი მას ასეთი გზავნილი აქვს:

“პედაგოგიკა, როგორც განათლების მეცნიერება, მიზნად ისახავს სწავლების პროცესის გაუმჯობესებასა და მოსწავლეების განვითარების მხარდაჭერას. მოსწავლეების დაშინება საატესტატო გამოცდებით, ან საკონტროლოებით, ან შემაჯამებლებით, ან ნებისმიერი სხვა მეთოდით, არ შეესაბამება პედაგოგიკის პრინციპებს და არ ითვლება ეფექტურ საგანმანათლებლო პრაქტიკად.

დაშინების მეთოდებმა, მათ შორის გამოცდებით დაშინებამ, შესაძლოა გამოიწვიოს სტრესი და შიში, რამაც შეიძლება სრულად დაანგრიოს მოსწავლეების მოტივაცია. პედაგოგიკის მიზანი კი არის მოსწავლეების დადებითი მოტივაციის და სწავლისადმი ინტერესის განვითარება, რომელიც მიიღწევა პოზიტიური სწავლების მეთოდების, მხარდაჭერისა და წახალისების გზით.

ვინც არაოფიციალურ გვერდებზე გავრცელებულ ინფორმაციებს იწონებთ, გეტყვით, რომ ისევ იმ ტოტალურ წარსულში ჩარჩით და არასდროს გიფიქრიათ არათუ განვითარებაზე, არამედ პედაგოგიკა არ გესმით რა არის!

ის მასწავლებლები, რომლებიც მასწავლებელთა სისტემური გამოცდების ჩაბარების წინააღმდეგ ხართ და მუდმივი განვითარების საჭიროებას ვერ ხედავთ, გეტყვით რამდენიმე მნიშვნელოვან მიზეზს, თუ რატომ ცდებით:

1. განათლების ხარისხის გაუმჯობესება: სისტემური გამოცდები უზრუნველყოფს, რომ მასწავლებლები ფლობენ შესაბამის ცოდნას და უნარებს, რაც აუცილებელია მაღალი ხარისხის განათლების მისაცემად. ეს დაეხმარება მათ თანამედროვე მეთოდების და ცოდნის ათვისებაში, რაც საბოლოოდ მოსწავლეებისთვის უკეთესი სასწავლო გარემოს შექმნას გულისხმობს.

2. მუდმივი პროფესიული განვითარება: განათლების სფერო მუდმივად განიცდის ცვლილებებს და განვითარებას. ახალი კვლევები, ტექნოლოგიები და პედაგოგიური მეთოდები მუდმივად ჩნდება. მასწავლებლების მუდმივი პროფესიული განვითარება მათ საშუალებას აძლევს, ფეხი აუწყონ ამ ცვლილებებს და ახალი უნარები და მიდგომები გაატარონ პრაქტიკაში.

3. მოტივაცია და კარიერული ზრდა: მუდმივი სწავლება და განვითარება მასწავლებლებს მოტივაციას აძლევს კარიერული ზრდისთვის. ეს ხელს უწყობს მათი პროფესიული კმაყოფილების გაზრდას და სამუშაოს მიმართ უფრო დადებითი დამოკიდებულების ჩამოყალიბებას.

4. მოსწავლეების წარმატება: კარგად მომზადებული და მუდმივად განვითარებადი მასწავლებლები უკეთეს შედეგებს აღწევენ მოსწავლეების სწავლაში. მათ უკეთ ესმით მოსწავლეების საჭიროებები, რაც ეფექტური სწავლების პროცესის დაგეგმვის და განხორციელების საშუალებას იძლევა.

5. სტანდარტების შენარჩუნება: სისტემური გამოცდები უზრუნველყოფს, რომ მასწავლებლები შეესაბამებიან განათლების სისტემის მიერ დაწესებულ სტანდარტებს და მოთხოვნებს. ეს ხელს უწყობს განათლების სისტემაში ერთიანობის და თანმიმდევრულობის შენარჩუნებას.
ამიტომ, მასწავლებლების სისტემური გამოცდები და მუდმივი განვითარება მნიშვნელოვანია როგორც მათთვის, ასევე მთლიანად განათლების სისტემისთვის და მოსწავლეების წარმატებისთვის.

მაგრამ რაც დღეს, სრულად საგანმანათლებლო სივრცეში, განსაკუთრებით სკოლებში ხდება, არის ზემოთ ჩამოთვლილი პუნქტების სრული ანტიპოდი და დიახ, ყველა ამის მონაწილენი ხართ!”, – წერს ახალგაზრდა მასწავლებელი.

ასევე იხილეთ:

„XII კლასში მოსწავლეთა ეროვნული განმსაზღვრელი შეფასების სისტემა 2027 წლიდან ამოქმედდება“ – მინისტრი უკვე უმაღლესში ჩარიცხვის ახალ წესზე საუბრობს