სკოლის დირექტორთა კონკურსის მონაწილეების მსვლელობა დღეს პრეზიდენტის სასახლესთან, აქციით დასრულდება

დღეს,12 დეკემბერს, 12:00 საათზე, თბილისის კლასიკური გიმნაზიიდან მსვლელობა მოწოდებით: „ნურაფრის შეგეშინდება მასწავლებელო, იბრძოლე მოსწავლისთვის!“ გაიმართება და ის პრეზიდენტის სასახლესთან, აქციით დასრულდება.

მსვლელობის ორგანიზატორები მასწავლებლები, სკოლის დირექტორთა კონკურსის ე.წ. დაბლოკილი კანდიდატები, მაია ეკალაძე და დავით ფერაძე არიან, რომლებიც არაერთი დღეა (4 დეკემბრიდან), ღამეს განათლებისა და მეცნიერების სამინისტროსთან ათევენ, გიორგი ამილახვარის უწყების მიერ ჩატარებული კონკურსის შედეგებს აპროტესტებენ და მათ გამოსწორებას მოითხოვენ.

მასწავლებლების მსვლელობა დღეს სკოლებში საგაკვეთილო საათების მიმდინარეობისას გაიმართება და როგორც ორგანიზატორები ამბობენ, მოიცავს თბილისის კლასიკური გიმნაზიის მიმდებარე სკოლებს (53-ე; 51; 47-ე სკოლები). ბოლოს კი, 15:00 საათზე, აქცია საქართველოს პრეზიდენტის სასახლესთან გაიმართება, სადაც მონაწილეები მოუწოდებენ პრეზიდენტ სალომე ზურაბიშვილს, რომ გაეცნოს მათ მოთხოვნებს და “მხარი დაუჭიროს სკოლას, მოსწავლესა და მასწავლებელს”.

დირექტორთა კონკურსის მონაწილეებმა პრემიერ-მინისტრ ირაკლი ღარიბაშვილთა შეხვედრის მოთხოვნით მათ განცხადება მთავრობის ადმინისტრაციაში 11 დეკემბერს შეიტანეს და პასუხს ელიან. “დაგვპირდნენ, რომ ათი დღის განმავლობაში წერილობით პასუხს მივიღებთ”, – უთხრა დღეს EDU.ARIS.GE-ს დავით ფერაძემ.

განახლება:

განათლებისმინისტრის მიერ დღეს გაკეთებული განცხადების შემდეგ, აქციის მონაწილეებმა მიიღეს გადაწყვეტილება, რომ გვიან საღამომდე განათლების სამინისტროსთან გადაინაცვლებენ.

ამავე თემაზე:

„განათლების სამინისტრო ტყუილშია გაჯიუტებული და ეს, უპირველესად, მოსწავლეს აზიანებს“ – გიორგი ჭაუჭიძის შეფასება

სკოლის დირექტორთა ხელახალი კონკურსი, გასაუბრება და დისკრეცია – რა გამოსავალს სთავაზობს განათლების სამინისტროს ექსპერტი

„გამოასწორეთ შეცდომა, გამოიყენეთ დისკრეცია“ – მასწავლებლის გზავნილი განათლების მინისტრს, რომელიც შიმშილობის დაწყებაზე საუბრობს